ԵՐԵՎԱՆ, 6 օգոստոսի․/Նովոստի-Արմենիա/․ Կառավարությունն, ըստ էության, ձևավորված է, նշանակված չէ միայն արտաքին գործերի նախարարը:
Այս մասին հայտնեց ՀՀ վարչապետ Նիկոլ Փաշինյանը նոր ձևավորված կառավարության առաջին նիստում:
Վարչապետը նշեց, որ առաջիկայում պետք է զբաղվեն կառավարության ծրագրի իրականացմամբ, և իրականացման միջոցառումների գործում հետևելու են «Քաղաքացիական պայմանագիր» կուսակցության նախընտրական ծրագրին՝ մինչև 2050 թ. Հայաստանի վերափոխման ռազմավարությանը, ինչպես նաև նախընտրական քարոզարշավի ընթացքում քաղաքացիների հետ երկխոսության ընթացքում ձևավորված նախընտրական խոստումների վրա:
«Նախընտրական քարոզարշավը կենդանի գործընթաց է, և այս նախընտրական քարոզարշավի ամենակարևոր առանձնակատկությունն այն էր, որ կենդանի երկխոսություն ունեցանք ՀՀ-ի քաղաքացիների հետ: Եվ մենք, կառավարության ծրագիրը կազմելիս, պետք է ոչ միայն հենվենք այն գրավոր փաստաթղթերի վրա, որոնք ընդունվել են, այլև այն խոստումների վրա, որը ձևավորվել է քաղաքացիների հետ շփման արդյունքում»,-ասաց Նիկոլ Փաշինյանը:
Նա հավելեց նաև, որ մինչև օգոստոսի 23-ը կառավարության ծրագիրը կներկայացվի ԱԺ, որն առաջիկայում իրենց համար պետք է առաջնահերթություն լինի:–0–
