ԵՐԵՎԱՆ, 5 հունվաի./Նովոստի-Արմենիա/. Կադաստրի կոմիտեի ղեկավար Սուրեն Թովմասյանն այսօր կառավարության նիստի ժամանակ ներկայացրեց ինքնակամ կառույցների հաշվառման նոր ընթացակարգը:
Նա հիշեցրեց, որ 2021 թ.-ի դեկտեմբերի 16-ին ՀՀ կառավարությունը «Հայաստանի Հանրապետության քաղաքացիական օրենսգրքում փոփոխություններ և լրացումներ կատարելու մասին» օրենքի նախագծով որոշեց սահմանել ինքնակամ կառույցների և կիսակառույց ինքնակամ կառույցների հատվածների հաշվառման կարգը, ինչպես նաև ինքնակամ կառույցի հաշվառման փաթեթի վերաբերյալ պատվիրատուի համաձայնության ձևը:
«Այս նախագծով մենք կարգավորում ենք այն հարցը, թե ինչ ընթացակարգով պետք է ինքնակամ կառույցները հաշվառվեն, որից հետո այդ ինքնակամ կառույցները համայնքին ներկայացվեն որպես օրինականացման գործընթաց»,-ասաց Թովմասյանը:
Կադաստրի կոմիտեի ներկայացրած նախագծի համաձայն՝ ինքնակամ կառույցի հաշվառումն իրականացվում է պատվիրատուի դիմումի հիման վրա։ Պատվիրատուն կարող է լինել ինքնակամ կառույցը հաշվառելու նպատակով չափագրողին դիմած ֆիզիկական կամ իրավաբանական անձ, պետական կամ տեղական ինքնակառավարման մարմին:
«Ըստ այդմ կարգավորումներով նախատեսվում է, որ ինքնակամ կառույց ունեցող քաղաքացին պետք է դիմի կադաստրի կոմիտեի կողմից որակավորման վկայական ստացած չափագրման մասնագետին, այնուհետև մասնագետը պետք է իրականացնի իր աշխատանքները՝ տեղում ուսումնասիրելով շինությունը», - ասաց կադաստրի կոմիտեի ղեկավարը։
Պատվիրատուի կողմից չափագրման փաթեթի բոլոր տվյալները ստուգելուց հետո հաշվառման փաթեթի վերաբերյալ համաձայնություն ձեռք բերվելու դեպքում պատվիրատուն և չափագրողը կազմում և ստորագրում են համաձայնագիր, որը պետք է ներբեռնվի առցանց չափագրման գրասենյակ՝
www.e-cadastre.am առցանց էլեկտրոնային հարթակում, որտեղ ներբեռնելուց հետո փաթեթն այլևս ենթակա չէ խմբագրման:
«Հրապարակված օրենքի նախագծով սահմանվել են նաև հաշվառում իրականացնելու նպատակով Կադաստրի կոմիտե ներկայացվող դիմումների ժամկետները։ Օրինակ՝ Երևանում կառուցված ինքնակամ կառույցների հաշվառման դիմումները պետք է ներկայացվեն մինչև մինչև 2023թ.-ի հունվարի 1-ը, իսկ օրինակ՝ այլ քաղաքային համայնքների դեպքում մինչև 2024 թ.-ի հունվարի 1-ը։ Այս դրույթները վերաբերում են մինչև 2021թ.-ի հունվարի 1-ը կառուցված շինությունների վերաբերյալ դիմումներին»,-ասաց Թովմասյանը։
Նա հավելեց նաև, որ 2021թ.-ի հունվարի 1-ից հետո կառուցված շինությունների դեպքում դիմումները պետք է ներկայացվեն կառավարության որոշման ուժի մեջ մտնելուց հետո երկու ամսվա ընթացքում։
«2021 թ.-ին իրականացված օդային լուսանկարահանման արդյունքում մենք ֆիքսված ունենք մինչև 2021 թ.-ը կառուցված բոլոր ինքնակամ կառույցները: Եվ արձանագրում ենք այն փաստը, որ 2022-2024 թթ. կառուցված ինքնակամ շինությունները ուղղակի արտացոլված չեն լինի և դուրս կմնան հաշվառման ցուցակից»,-եզրափակեց Թովմասյանը:-0-
