ԵՐԵՎԱՆ, 19 հուլիսի․ /Նովոստի-Արմենիա/․ ՀՀ Գիտության, կրթության, մշակույթի և սպորտի նախարար Արայիկ Հարությունյանը կիրակի Միասնական տեղեկատվական կենտրոնում կայացած ճեպազրույցի ժամանակ հայտնեց, որ ինքն այցելել է Տավուշի մարզի սահմանամերձ Այգեպար, Մովսես, Բերդ և Ներքին Կարմրաղբյուր համայնքներ և ծանոթացել ուսումնական հատստությունների վիճակին վերջին իրադարձություններից հետո:
Загружается новость ... "Лево"
«Մեզ հետաքրքրում էր, թե ուսումնական հաստատությունները սեպտեմբերի 1-ից առաջ ինչպես են նախապատրաստվում ուսումնական տարվան: Գիտեք, որ մենք համավարակի պատճառով դասերն ընդհատել ենք մարտի կեսերից և հիմա քննարկում ենք դասերը վերսկսելու հնարավորությունները, բայց սրան գումարվում է լարված իրավիճակը այդ համայնքներում և մեզ նաև հետաքրքրում է, թե ապաստարանների տեսանկյունից, անվտանգության տեսանկյունից դպրոցներն ինչպես են պաշտպանված: Հանձնարարականներ են եղել, որ մինչև սեպտեմբերի 1-ը սահմանամերձ համայնքներում պատշաճ պատրաստություն լինի ապաստարանների, որպեսզի հարկ առաջացած դեպքում երեխաներին տեղափոխենք ապաստարաններ»,- ասաց նախարարը:
Նախարարը հանտնեց, որ նաև սահմանամերձ համայնքներից մեկում հակառակորդը մանկապարտեզի շենք է վնասել, որի հետ կապված իրենք նամակով դիմել են ՅՈւՆԵՍԿՕ-ին:
Հայ-ադրբեջանական սահմանին իրավիճակի սրման մասին
Հուլիսի 12-ից հայ-ադրբեջանական սահմանին Ադրբեջանը Հայաստանի դեմ ագրեսիվ գործողություններ է կատարում: Ադրբեջանի ԶՈՒ-ն սահմանային դիրքը գրավելու մի քանի փորձ է կատարել տանկի, հրետակոծության, հաուբիցի, անօդաչու թռչող սարքերի և «Գրադ» ՀԿՌՀ-ի օգտագործմամբ:
Հակառակորդը հրետակոծում է հայկական հենակետերը, նաև թիրախավորում բնակելի տարածքներ՝ Չինարի, Այգեպար, Ներքին Կարմիրաղբյուր և Պառավաքար գյուղերը, ինչպես նաև Բերդ քաղաքը: Հարվածի տակ են հայտնվել Տավուշի երկու ձեռնարկություն:
Հայկական ԶՈւ-ն համարժեք պատասխան է տալիս պարբերաբար կրկնվող հրետակոծություններին և ճնշում հակառակորդի ակտիվությունը: ՀՀ ԶՈՒ-ն ոչնչացրել է Ադրբեջանի ԶՈՒ-ի 13 հարվածային ԱԹՍ:
Հուլիսի 16-ի գիշերը հակառակորդը դիվերսիոն փորձ է ձեռնարկել, որը թեժ մարտից հետո կանխվել է ՀՀ ԶՈՒ-ի կողմից և թշնամին, կորուստներ կրելով, հետ է շպրտվել: Դրան հաջորդել է Այգեպար և Մովսես գյուղերի հրետակոծությունը ՝ ականանետի և Դ-30 հաուբիցի կիրառմամբ: ՀՀ ԶՈՒ-ի կողմից խոցվել է հակառակորդի տանկ, հրետանային և ականանետային մարտկոցների կրակային դիրքեր: Հուլիսի 17-ից հայ-ադրբեջանական սահմանին հարաբերական անդորր է:
ՊՆ տվյալներով, հակառակորդի կրակոցների հետևանքով վիրավորում է ստացել 20 զինծառայող, որից այս պահին դրությամբ բուժում է ստանում 10-ը, մեկի դրությունը գնահատվում է ծայրահեղ ծանր: Հակառակորդի կրակոցից զոհվել են մայոր Գարուշ Վեմիրի Համբարձումյանը, կապիտան Սոս Փայլակի Էլբակյանը, ժամկետային զինծառայողներ՝ կրտսեր սերժանտ Սմբատ Գևորգի Գաբրելյանը և կրտսեր սերժանտ Գրիշա Վահանի Մաթևոսյանը: Քաղաքացիական բնակչության շրջանում զոհեր չկան, հուլիսի 16-ին հակառակորդի անօդաչուի հարվածից վիրավորում է ստացել Չինարի գյուղի բնակիչ: Ադրբեջանում պաշտոնապես հաստատվել է 11 զոհ:
Հայ-ադրբեջանական սահմանին լարվածության մեծացման հետ կապված իրենց մտահոգությունն են հայտնել, մասնավորապես, ՌԴ ԱԳՆ-ն և Հարավային Կովկասում և Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարը, ԵԱՀԿ ՄԽ համանախագահները, ԱՄՆ պետդեպարտամենտը, ՄԱԿ-ը, ՆԱՏՕ-ն և այլ միջազգային կառույցներ: ՀԱՊԿ-ը նույնպես մտահոգություն է հայտնել Հայաստանի և Ադրբեջանի սահմանինի սրման հետ կապված և կրակը դադարեցնելու կոչ արել: -0-