ԵՐԵՎԱՆ, 16 օգոստոսի./Նովոստի–Արմենիա/. ՇՄՆ Հիդրոօդերևութաբանության և մոնիթորինգի կենտրոնի պետի տեղակալ Գագիկ Սուրենյանը զգուշացնում է, որ առաջիկա 5 օրերին ջերմաստիճանի բարձրացմամբ պայմանավորված, Շիրակում, Արագածոտնում, Կոտայքում, Արարատում, Արմավիրում, Վայոց Ձորում, Սյունիքում և Երևանում սպասվում է բարձր կարգի հրդեհավտանգ իրավիճակ:
«Ազգաբնակչությանը հորդորում ենք, պահպանել հրդեհավտնագության կանոնները», – նշել է օդերևութաբանը Facebook–յան իր էջում:
Երևանում օգոստոսի 20–ին` գիշերը և երեկոյան ժամերին՝ քաղաքի առանձին հատվածներում սպասվում է կարճատև անձրև և ամպրոպ, ամպրոպի ժամանակ հնարավոր է քամու ուժգնացում 18-20մ/վրկ արագությամբ:
Օգոստոսի 16-19-ին սպասվում է առանց տեղումների եղանակ: Ջերմաստիճանն աստիճանաբար կբարձրանա։ Այսօր ցերեկային ժամերին մայրաքաղաքում սպասվում է +34...+36, գիշերը` +16..+18, իսկ արդեն օգոստոսի 19–ին Երևանում ցերեկը կանխատեսվում է +36...+38, գիշերը` +17...+19։
Հանրապետության տարածքում օգոստոսի 16-20-ին` առանձին շրջաններում, կեսօրից հետո և գիշերը, սպասվում է կարճատև անձրև և ամպրոպ, առանձին հատվածներում հնարավոր է նաև կարկուտ։
Քամին հարավ-արևմտյան՝ 5-10մ/վրկ, ամպրոպի ժամանակ սպասվում է քամու ուժգնացում 15-20մ/վրկ արագությամբ։-0-
