Իսկական ձմեռ. Հայաստանի մի շարք շրջաններում առատ ձյուն է տեղում (ՎԻԴԵՈ)
ԵՐԵՎԱՆ, 6 հոկտեմբերի./Նովոստի–Արմենիա/. Հայաստանի որոշ շրջաններում արդեն ձմեռ է։
Հիդրոօդերևութաբանության և մոնիթորինգի կենտրոնի պետի տեղակալ Գագիկ Սուրենյանը Facebook–յան իր էջում տեսանյութեր է հրապարակել, որտեղ երևում է, որ Շիրակի մարզի Ամասիա, Լոռու մարզի Մարգահովիտ բնակավայրերում, Վանաձորում առատ ձյուն է տեղում։
Արտակարգ իրավիճակների նախարարությունն իր հերթին տեղեկացնում է, որ ՀՀ տարածքում ավտոճանապարհներն անցանելի են։
Դիլիջանի թունելի մոտակայքում, Շիրակի մարզի Աշոցքի և Ամասիայի տարածաշրջաններում, Լոռու մարզի Վանաձոր քաղաքում, Մեղվահովիտ և Աթան գյուղերում տեղում է ձյուն։
Սիսիան-«Զանգեր», Արծվանիկ-Շուռնուխ և Քաջարան քաղաքից «Մեղրու սար» տանող հատվածներում մառախուղ է։
Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը բաց է։–0–
