ԵՐԵՎԱՆ, 21 հունիսի./Նովոստի–Արմենիա/. Արտահերթ խորհրդարանական ընտրությունների քվեարկության նախնական արդյունքների հրապարակումից հետո ԿԸՀ նախագահ Տիգրան Մուկուչյանը պարզաբանել է, թե ինչ կլինի, եթե «Հայաստան» դաշինքը հրաժարվի մանդատներից։
Քվեարկության նախնական արդյունքների ամփոփումից հետո «Հայաստան» դաշինքը հայտարարել է, որ խորհրդարանական ընտրությունների հրապարակվող արդյունքները խիստ վիճահարույց են և վստահություն չեն ներշնչում։ Դաշինքում նշել են, որ քանի դեռ բոլոր խնդրահարույց հարցերը չեն ստացել սպառիչ բացատրություններ, և փարատված չեն կասկածները, «Հայաստան» դաշինքը չի ընդունելու ընտրությունների արդյունքները։
«Ընտրությունների վերջնական արդյունքները կներկայացվեն քվեարկությունից հետո յոթերորդ օրը, մինչ այդ մենք կուսումնասիրենք տվյալները, կստուգենք բոլոր ահազանգերը և անհրաժեշտության դեպքում կկատարենք շտկումներ», – ասաց Մուկուչյանը երկուշաբթի լրագրողներին ԿԸՀ նիստից հետո։
Ինչպես նշեց Մուկուչյանը, իրականացվել է ընտրական գործընթացի մոնիտորինգ այն ընտրական տեղամասերում, որտեղից ստացվել են տվյալները, չեն եղել անվավեր քվեաթերթիկների հետ կապված լուրջ խնդիրներ, բայց բոլոր դեպքերը կուսումնասիրվեն։
Պատասխանելով այն հարցին, թե ինչ կարող է լինել, եթե «Հայաստան» դաշինքը հրաժարվի բոլոր մանդատներից` նա նշեց, որ շատ բաներ պետք է պարզաբանի օրենսդրությունը, որը դեռ պետք է ուսումնասիրել։
«Այս պահին մանդատներից հրաժարման ամրագրված ինստիտուտ մենք չունենք։ Իհարկե, կարող է լինել տարբերակ, որ ենթադրենք թեկնածուները, որոնց հատկացվում են մանդատներ, հրաժարվում են իրենց մանդատներն ստանալուց՝ ինքնաբացարկ ներկայացնելու միջոցով, այդ ժամանակ այն փոխանցվում է ցուցակում հաջորդ թեկնածուին։ Բայց քանի որ օրենքով խորհրդարանում պետք է լինի ընդդիմություն, մենք անպայման հանդես կգանո պարզաբանումով և մանդատների բաշխմամբ ու կներկայացնենք բոլոր մանրամասները», – ասաց Մուկուչյանը։
Նա նշեց, որ մանդատները բաշխվում են բացառապես այն կուսակցությունների միջև, ովքեր Ընտրական օրենսգրքով սահմանված կարգով պետք է ստանան այդ մանդատները։ Նրանց փոխարեն այլ ուժի այդ մանդատները փոխանցվել չեն կարող։
«Եթե որևէ ուժի ցուցակի բոլոր անձինք հրաժարվեն մանդատներից, դա նշանակում է՝ ոչ ոք մանդատ չի ստանա, և խորհրդարանում կմնան այն ուժերը, որոնք կան, բայց մենք չենք քննարկել նման տարբերակներ։ Դեռևս դժվարանում եմ ասել` նշանակու՞մ է դա, որ կլինեն նոր ընտրություններ, և, ըստ էության, դա ներառված չէ ԿԸՀ–ի լիազորությունների մեջ։ Մեր խնդիրն ընտրությունների անցկացումն է, արդյունքների ամփոփումն ու մանդատների բաշխումը, սրանով մեր լիազորություններն ավարտվում են». – ասաց Մուկուչյանը։
Ինչ վերաբերում է ձայների հաշվարկի սկզբում տարբեր քաղաքներում էլեկտրաէներգիայի անջատումներին, ապա նրա խոսքով ամեն դեպքում այդ ընտրական տեղամասերում փորձել են առավելագույնս կարճ ժամկետներում վերականգնել էլեկտրաէներգիայի մատակարարումը։
«Տեխնիկայի հետ կապված խնդիրներ չեն եղել, քանի որ եղել են անհրաժեշտ մարտկոցներ քվեարկության ընթացքում։ Հիմնական խնդիրն արձանագրվել է տեսախցիկների հետ, բայց դրանք միացել են էլեկտրաէներգիայի մատակարարումից անմիջապես հետո», – ասաց Մուկուչյանը։–0–
