Հունվարի 1-ից արգելվում է ծխախոտի և վեյպերի ցուցադրությունը վաճառակետերում և սննդի օբյեկտներում, կարգելվի նաև ծխախոտի օգտագործումը սննդի բոլոր օբյեկտներում (ՖՈՏՈ)

ԵՐԵՎԱՆ, 3 հունվարի./Նովոստի-Արմենիա/. Հայաստանում հունվարի 1-ից արգելվում է ծխախոտի և վեյպերի ցուցադրությունը վաճառքիկետերում և հանրային սննդի օբյեկտներում:

Այս մասին Facebook-յան իր էջում հայտնում է առողջապահության նախկին նախարար, ԱԺ պատգամավոր Արսեն Թորոսյանը:

Նա նշել է, որ 2022 թվականի հունվարի 1-ից ուժի մեջ են մտել դեռևս 2020 թվականի փետրվարի 13-ին ընդունված ծխախոտային արտադրատեսակների եվ դրանց փոխարինիչների օգտագործման հետեվանքով առողջությանը հասցվող վնասի նվազեցման եվ կանխարգելման մասին օրենքի մի շարք կարևոր դրույթներ։

«Ըստ այդ դրույթների այլևս արգելված են ծխախոտային որևէ արտադրատեսակի՝ ավանդական ծխախոտի, էլեկտրոնային (տաքացվող) ծխախոտի, հեղուկների հիմքի վրա նիկոտինային արտադրատեսակի (վեյպ), նիկոտինի մատակարարման էլեկտրոնային սարքերի հրապարակային ցուցադրությունը վաճառքի կետերում և հանրային սննդի օբյեկտներում», - նշել է Թորոսյանը։

Նաև արգելված է վերոնշյալ որևէ արտադրանքի իրացման (վաճառքի) համար նախատեսված տարածքներում՝ դրանց (այդ թվում՝ դրանց դատարկ կամ մեծացրած չափսերով տուփերի, բլոկների, ապրանքային նշանն իմիտացնող գունային պաստառների) կամ դրանց ապրանքային նշանների կամ խորհրդանիշների՝ սպառողի համար տեսանելի վայրում տեղադրումը:

Թորոսյանը նաև նշել է, որ այս դրույթների լիարժեք կիրառումը ժամանակի ընթացքում էականորեն իջեցնելու է ծխախոտի օգտագործումը մեր երկրում, ինչն էականորեն ազդելու է մեր բնակչության առողջության բարելավման և մեր երկրի տնտեսության զարգացման վրա։

«Տնտեսվարողներին կոչ եմ անում խստորեն հետևել օրենքի պահանջների կատարմանը, իսկ ստուգող մարմիններին՝ պատշաճ վերահսկողություն իրականացնել», - նշել է Թորոսյանն՝ ավելացնելով, որ առանց առողջ հասարակության չի կարող լինել ամուր տնտեսություն։

Թորոսյանը որպես հետգրություն ավելացրել է, որ 2022 թվականի մարտի 15-ից ուժի մեջ կմտնեն նաև հանրային սննդի բոլոր օբյեկտներում (փակ և բաց) բոլոր տեսակի ծխախոտային արտադրատեսակների օգտագործման արգելքի դրույթները։-0-