Հայաստանում ծխախոտը պետք է «տակից» վաճառեն. ծխախոտ, ծխախոտի տուփ վաճառքի կետերում այլևս չեն երևալու (ՎԻԴԵՈ)

ԵՐԵՎԱՆ, 5 հունվարի./Նովոստի-Արմենիա/. Հայաստանում  16 տարեկանից բարձր բնակչության 27. 9 %-ը ծխում է, ծխողների գերակշռող մասը տղամարդիկ են (51 %) և յուրաքանչյուր երկրորդ տղամարդ ծխող է:

Այս մասին կառավարության նիստին հայտնեց առողջապահության նախարար Անահիտ Ավանեսյանը՝ հիշեցնելով, որ 2022 թ.-ի հունվարի 1-ից ուժի մեջ են մտել դեռևս 2020 թ-ի փետրվարի 13-ին ընդունված «Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին» օրենքի դրույթները:

«Մեր քաղաքականությունն է, հանձնառությունն է՝ հնարավորինս նպաստել ծխախոտի օգտագործման նվազեցմանը և այդ օգտագործման արդյունքում նաև առողջությանը պատճառած վնասների կանխմանը: Այսպիսով, հունվարի 1-ից ուժի մեջ է մտնում ծխախոտային արտադրատեսակների հրապարակային ցուցադրման արգելքը վաճառասրահներում և հանրային սնդդի օբյեկտներում, բացառությամբ օդանավակայանի անմաքս առևտրի խանութների», - ասաց Ավանեսյանը:

Նախարարը նշեց նաև, որ ուժի մեջ է մտնում նույն արտադրատեսակների մակետների և դրանց գովազդային ցուցադրությունը: Նախկինում կրպակներում շատ տեսանելի վայրերում հստակ կերպով տուփերը, մակետները ցուցադրելու միջոցով ակտիվ գովազդ էր տարվում:

«Մեր կարծիքով՝ սա կնպաստի գովազդի ազդեցության շնորհիվ նաև մեր երիտասարդների շրջանում ծխախոտի օգտագործման և, ընդհանուր առմամբ ոչ վարակիչ հիվանդությունների բեռի նվազեցմանը: Հայաստանում, ցավոք, սրտանոթային հիվանդությունների, քաղցկեղի և տղամարդկանց մոտ հիմնականում թոքի քաղցկեղի տարածվածությունը մեզ հուշում է, որ ամեն ինչ պիտի անենք՝ այս առումով պայքարը հետևողական տանելու համար»,-ասաց նախարարը:

ՀՀ վարչապետ Նիկոլ Փաշինյանն էլ իր հերթին ընդգծեց, որ այս կարգավորմամբ առօրյայում ծխախոտ, ծխախոտի տուփ վաճառքի կետերում, խանութներում չպետք է տեսնեն:

«Այսինքն` ծխախոտի տուփը մեզ համար հանրային կյանքում վերանում է, բացառությամբ այն դեպքերի, երբ մարդն ասենք ձեռքին ուղղակի ունի: Կոմերցիոն տարածքներում ծխախոտի տուփի հետ չպետք է առնչվենք», -ասաց վարչապետը՝ հիշեցնելով խորհրդային ժամանակների հայտնի բառապաշարը՝ «ծխախոտը պետք է «տակից» վաճառեն»:

Նախարարն էլ իր հերթին նշեց, որ տեսանելի վայրերում, վաճառքի սրահներում ծխախոտը կամ դրան առնչվող գովազդն ընդհանրապես պետք է տեսանելի չլինի: «Մենք բոլորս էլ տեղյակ ենք, որ դրանք հիմնականում տեղակայված են լինում խանութի ամենաբանուկ մասում՝ քաղցրավենիքների և վճարելու հատվածում և ամենատեսանելի վայրերում: Պետք է խանութների այդ հատվածում ծխախոտի կամ դրա փոխարինիչների որևէ տուփ պետք է ցուցադրված չլինի»,-ասաց Ավանեսյանը:-0-