Գերեվարված զինծառայողների հարազատները վարչապետի հետ հանդիպում են պահանջում. մամուլի խոսնակն արձագանքել է ստեղծված իրավիճակին

ԵՐԵՎԱՆ, 10 օգոստոսի./Նովոստի–Արմենիա/. Հայաստանի Հանրապետության վարչապետի մամուլի խոսնակ Մանե Գևորգյանն անդրադարձել է կառավարության շենքի դիմաց Խծաբերդում գերեվարված շիրակցի զինվորների հարազատների նստացույցին և պատասխանել հարցին՝ արդյոք վարչապետը պատրաստվո՞ւմ է ընդունել նրանց:

Նշենք, որ նախօերին գերեվարված զինծառայոների հարազատները բողոքի ակցիա էին կազմակերպել։ Նրանք պահանջում են վարչապետ Նիկոլ Փաշինյանի հետ հանդիպում՝ հայտարարելով, որ կմնան կառավարության շենքի մոտ այնքան ժամանակ, քանի դեռ այդ հանդիպումը տեղի չի ունեցել։ Նրանք ակնկալում են, որ իրենց խնդրին շուտափույթ լուծում կտրվի և գերեվարված տղաները կվերադառնան Հայաստան։ Հարազատների խոսքերով, իշխանությունն իրենց խոստացել է, որ խնդրին լուծում կտա, նույնիսկ ժամկետ է նշվել, բայց դեռ որևէ արդյունք չկա։

Վարչապետի մամուլի խոսնակ Մանե Գևորգյանի խոսքով, գերեվարվածների հարազատները գիտեն, որ վարչապետի հետ պարբերաբար հանդիպումներ ունենալու հնարավորություն ունեն և դրա համար առկա է կոնկրետ մեխանիզմ:

«Այս պայմաններում նստացույցի միջոցով վարչապետից հանդիպում պահանջելու գործելակերպը տարակուսանքի տեղիք է տալիս որքան էլ մեր գերեվարված զինվորների հարազատների վիճակը հասկանալի է», – նշել է Գևորգյանը` պատասխանելով «Արմենպրեսի» հարցմանը։

Վարչապետի մամուլի խոսնակը նաև նշել է, որ վարչապետը Խծաբերդում գերեվարված զինվորների հարազատների հետ վերջին 9 ամիսներին հանդիպել է 9 անգամ, այդ թվում՝ երկու անգամ Շիրակի մարզում:

«Նման վերջին հանդիպումը տեղի է ունեցել հուլիսի 23-ին: Վարչապետը գերեվարվածների հարազատների հետ վերջին 9 ամսում տասնյակ հանդիպումներ է ունեցել: Ընդ որում, եղել են հանդիպումներ, որոնք տեղի են ունեցել առանց ժամային սահմանափակումների: Վարչապետը բոլոր այդ հանդիպումներում գերեվարված զինվորների հարազատներին ներկայացրել է առկա ողջ տեղեկատվությունը և ասել, որ մշտապես պատրաստ է նրանց հետ կիսել տեղեկատվությունը, այդ թվում՝ հանդիպումների միջոցով», – ասել է Գևորգյանը` ավելացնելով, որ Խծաբերդում գերեվարվածների հարազատները բազմիցս հանդիպումներ են ունեցել նաև ԱԱԾ տնօրենի, Շիրակի մարզպետի հետ:

Ադրբեջանում պահվող հայ գերիների մասին

Հայաստանի իշխանությունները չեն հայտնում Ադրբեջանում պահվող հայ գերիների ճշգրիտ թիվը՝ այն համարելով պետական գաղտնիք: Մարդու իրավունքների Եվրոպական դատարանում Ադրբեջանում գերության մեջ պահվող 288 հայ ռազմագերիների մասին հարցումներ են եղել: Ընդհանուր առմամբ, հուլիսի 3-ի դրությամբ հաջողվել է տուն վերադարձնել 102 գերու: Վերջին շրջանում Բաքվում քրեական գործընթացներ են ընթանում հայ գերիների նկատմամբ, որոնց շինծու մեղադրանքներ են ներկայացվում:

Բաքվի ծանր հանցագործությունների դատարանը հայ ռազմագերիներին դատապարտել է 6 տարվա ազատազրկման՝ նրանց մեղավոր ճանաչելով «ահաբեկչության, անօրինական զենք պահելու և պետական սահմանն ապօրինի հատելու համար»։

Ադրբեջանական դատարանի որոշմամբ, Հայաստանի քաղաքացիներն իրենց պատիժը կկրեն ընդհանուր ռեժիմի բանտում, պատժաչափի ավարտից հետո էլ կարտաքսվեն Ադրբեջանի տարածքից։

Հայաստանցի զինվորականները գերեվարվել էին ռազմական գործողությունների ավարտից ավելի քան մեկ ամիս անց։-0-