ԱԺ–ում միջադեպի հետքերով. քննիչներն այս պահին դեպքի վայրում են, ՔՊ–ական պատգամավորի վերքն էլ կարել են

ԵՐԵՎԱՆ, 31 մարտի./Նովոստի–Արմենիա/. Ազգային ժողովում պատգամավորների միջև տեղի ունեցած միջադեպի մասին ՀՀ քննչական կոմիտեում ստացվել է ահազանգ։

Ինչպես հայտնում է Քննչական կոմիտեի մամուլի խոսնակ Գոռ Աբրահամյանը, այս պահին քննիչները դեպքի վայրում են, իրականացնում են կատարվածի նախնական հանգամանքները պարզելուն ուղղված գործողություններ։

«Ներկա պահին կարող եմ միայն ասել, որ պատգամավորներից մեկը տարվել է Ոստիկանության բաժին, մեկ այլ պատգամավոր բուժօգնության է դիմել բուժհաստատություն», – նշել է նա։

Այսօր ավելի վաղ հայտնի էր դարձել, որ ԱԺ–ում ծեծկռտուք է տեղի ունեցել։ Պետաիրավական մշտական հանձնաժողովի փակ նիստում Միջազգային իրավական հարցերով ներկայացուցչի մասին օրենքում փոփոխությունների նախագիծը քննարկելու ժամանակ հանձնաժողովի նախագահ Վլադիմիր Վարդանյանը ինչ-որ բանից բորբոքվել է, ձայնը բարձրացրել և սկսել գոռգոռալ ընդդիմադիրների վրա, «Հայաստան» դաշինքի անդամ Մհեր Սահակյանն ասել է՝ մի գոռա, ձայնդ մի բարձրացրու, Վարդանյանն էլ տեղից վեր է թռել, կանգնել, ոտքի է կանգնել նաև Մհեր Սահակյանը, բանավեճը շարունակվել է, Վարդանյանը նետվել է դեպի Մհեր Սահակյանը ու ինչ-որ բան ասել, վերջինս էլ խփել է։

Ինչպես հաղորդում է aysor.am–ը, «Նաիրի» ԲԿ–ից հայտնել են, որ Վլադիմիր Վարդանյանը հիվանդանոց է տեղափոխվել դեմքի ձախ հոնքային շրջանի պատռված վերքով, կատարվել է առաջնային վիրաբուժական մշակում, վերքի ամբողջականությունը վերականգնվել է ներմաշկային կոսմետիկ կարով։ Վիճակը կայուն բավարար է, վերջինս դուրս է գրվել հիվանդանոցից։–0–