Զինծառայողին մեղադրանք է առաջադրվել՝ զենք հափշտակելու համար

ԵՐԵՎԱՆ, 20 մայիսի. /Նովոստի–Արմենիա/. ՀՀ ՔԿ ԶՔԳՎ վեցերորդ կայազորային քննչական բաժնում քննվող քրեական գործով մեղադրանք է առաջադրվել պարտադիր ժամկետային զինծառայողին՝ հրազեն հափշտակելու համար, հաղորդում է ՀՀ ՔԿ մամուլի ծառայությունը։

Քննությամբ բավարար ապացույցներ են ձեռք բերվել, որ N զորամասի ժամկետային զինծառայող Գ.Օրդյանը 2016 թվականի մայիսի 8-ին` ժամը 03-ի սահմաններում, վրանների պահպանությունն իրականացնելու ընթացքում,  հափշտակել է նույն վաշտի պարտադիր ժամկետային զինծառայող, կրտսեր սերժանտին ամրակցված «ԱԿՄ» տեսակի ինքնաձիգը և թաքցրել հարակից անտառում։ Ինքնաձիգը հայտնաբերվել է մայիսի 10-ին։

ժամկետային զինծառայող Գ.Օրդյանին մեղադրանք է առաջադրվել ՀՀ քրեական օրենսգրքի 238-րդ հոդվածի 1-ին մասով (զենք, ռազմամթերք, պայթուցիկ նյութեր կամ պայթուցիկ սարքեր հափշտակելը կամ շորթելը)։ Նրա նկատմամբ որպես խափանման միջոց է ընտրվել հրամանատարության հսկողության հանձնելը:

Քրեական գործով նախաքննությունը շարունակվում է:–0–