Թուրքական ապրանքները կարող են լուրջ սպառնալիք լինել ՀՀ բնակիչների համար. փորձագետ
ԵՐԵՎԱՆ, 4 մայիսի. /Նովոստի–Արմենիա/. Թուրքական ապրանքները կարող են լուրջ սպառնալիք լինել Հայաստանի բնակիչների համար, չորեքշաբթի լրագրողներին ասաց Հայաստանի սպառողների շահերի պաշտպանության ազգային ակադեմիայի փոխնախագահ Միլետա Արեստակեսյանը:
Ավելի վաղ ՀՀ էկոնոմիկայի նախարար Արծվիկ Մինասյանը հաղորդել է, որ դիտարկվում է հանրապետություն թուրքական ապրանքների ներկրումն արգելելու հնարավորությունը: Նրա խոսքով, այս հարցի շուրջ համապատսխան ուսումնասիրություններ են իրականացվում: Առաջին հերթին դիտարկվում են այն ապրանքները, որոնք սպառնում են Հայաստանի տնտեսությանը` թե´ որակի, թե´ մրցակցության տեսանկյունից:
«Թուրքիան անկանխատեսելի է, այնպես որ Հայաստանի համար նախատեսված ապրանքների խմբաքանակում հնարավոր է լինի թույն կամ քիմիական նյութեր, որոնք կարող են հանգեցնել ծանր հիվանդությունների, մասնավորապես` տղամարդկանց և կանանց անպտղության», - ասաց Արեստակեսյանը:
Նրա խոսքով, հայաստանյան շուկայում ներկայացված թուրքական ապրանքների 50 տոկոսից ավելին, մասնավորապես, պարենային ապրանքները և կոսմետիկան չեն ստուգվում և չեն հավաստագրվում:
«Մենք բազմիցս սևեռել ենք համապատասխան կառույցների ուշադրությունն այս հարցի վրա», - ասաց Արեստակեսյանը:
Հայաստանի սպառողների ազգային ակադեմիայի նախագահ Մելիտա Հակոբյանն, իր հերթին, նշեց, որ մինչ թուրքական ապրանքներին «ոչ» ասելը, հարկավոր է նախ առաջարկել դրանց փոխարինող ապրանքներ` հայրենական արտադրության կամ այլ երկրներից ներկրված:
«Այսօր Հայաստանում արտադրված ցանկացած ապրանք ունի ավելի բարձր ինքնարժեք, քան Թուրքիայից ներկրված նմանակը։ Այս խնդրի լուծումն է արտադրողների թվի ավելացումը և մրցակցության արդյունքում մատչելի գների ապահովումը», - ասաց Հակոբյանը:
Նա նաև հիշեցրեց, որ Հայաստանում հիմա մոտ 20 հազար մարդ գումար է վաստակում թուրքական ապրանքի ներկրման միջոցով, և թուրքական արտադրանքի մատակարարումից հրաժարվելու պարագայում կառաջանա նրանց աշխատանքի տեղավորման հարցը:
ԱՎԾ–ի տվյալներով, 2015 թ.-ին Թուրքիայից Հայաստան իրականացված ներկրումը կազմել է 136,9 մլն դոլար` նախորդ տարվա 232,3 մլն դոլարի դիմաց (41 տոկոսի նվազում): Թուրքական ապրանքները կազմում են Հայաստան ներկրվող ապրանքների ողջ ծավալի 4,2 տոկոսը: -0-
