Պաշտպանության հանձնաժողովը հավանություն տվեց «Զինվորական ծառայության մասին» օրինագծին
ԵՐԵՎԱՆ, 11 նոյեմբերի. /Նովոստի–Արմենիա/. ՀՀ ԱԺ պաշտպանության և անվտանգության հարցերի մշտական հանձնաժողովը նախօրեին երեկոյան արտահերթ նիստում դրական եզրակացություն տվեց «Զինվորական ծառայության և զինծառայողի կարգավիճակի մասին» օրենքի վիճահարույց նախագծին:
Ուրբաթ ավելի վաղ քվորում չապահովելու պատճառով մշտական հանձնաժողովի նիստը տեղափոխվել էր նույն օրն ավելի ուշ ժամի։
Ուսանողները Երևանում արդեն մի քանի օր է բողոքում են տարկետման սահմանափակման իրավունքի դեմ։ Նրանք մասնավորապես դեմ են տարկետման իրավունքի սահմանափակմանը` պնդելով, որ «Զինվորական ծառայության և զինծառայողի կարգավիճակի մասին» նոր օրինագիծը խոչընդոտելու է կրթության զարգացմանը։
ՀՀ պաշտպանության փոխնախարար Արտակ Զաքարյանը ներկայացրել է օրինագիծը երկրորդ ընթերցմամբ։ Նշվել է, որ օրինագիծը քննարկվել է տարբեր մակարդակներում, իսկ դրա հիմքում ընկած են արդյունավետ կառավարման, սոցիալական արդարության և հավասարության սկզբունքները։
Զաքարյանի խոսքով, առաջարկվում է տարկետում ստանալու նոր սկզբունք, որը հնարավորություն է տալիս լիարժեք օգտվել բարձրագույն կրթության առաջին փուլն անցնելու իրավունքից, ինչպես նաև ընտրել ծառայության տեսակը։ Նշվել է նաև, որ օրինագիծը նոր հնարավորությունն է բացում զինծառայության կազմակերպման հարցում։
Չնայած ուշ ժամին, ուսանողներն, այնուամենայնիվ, կրկին հավաքվել էին ԱԺ–ի շենքի դիմաց, որպեսզի ցույց տան իրենց համախմբվածությունն ու հետաքրքրվածությունը քննարկվող օրինագծի հարցում։
Նոր օրինագծով առաջարկվում է պարտադիր զինվորական ծառայության զորակոչից ուսումնառության նպատակով տարկետում տրամադրել միայն այն դեպքում, եթե Հայաստանում հավատարմագրված բարձրագույն ուսումնական հաստատություններում բակալավրի, կամ դիպլոմավորված մասնագետի, կամ ինտեգրված կրթական ծրագրով սովորող քաղաքացին պաշտպանության նախարարության հետ կնքում է քաղաքացիաիրավական բնույթի պայմանագիր՝ ուսումնառության ընթացքում ռազմական պատրաստություն անցնելու և ուսումնառության ավարտից հետո պաշտպանության նախարարության կողմից նշված վայրում և պայմաններում զինվորական ծառայություն անցնելու մասին, սակայն այս պարագայում այդ ուսանողները 2-ի փոխարեն կծառայեն 3 տարի ժամկետով։-0-
