Ովքե՞ր են ԱԺ ընտրությունների ֆավորիտներն` ըստ Gallup–ի
ԵՐԵՎԱՆ, 23 նոյեմբերի. /Նովոստի–Արմենիա/. Gallup International Association–ը Հայաստանում հարցում է իրականացրել արտահերթ խորհրդարանական ընտրությունների նախաշեմին` քաղաքացիների քաղաքական նախապատվությունները պարզելու համար։
Հարցումն անցկացվել է նոյեմբերի 17–21–ը Հայաստանի ողջ տարածքում, հարցմանը մասնակցել է 1111 մարդ։
Պատասխանելով այն հարցին, թե քաղաքական ո՞ր ուժին կտայիք ձեր ձայնն ընտրություններին` հարցվածների 68,3%–ը նշել է «Իմ քայլը» դաշինքը, որը գլխավորում է վարչապետի պաշտոնակատար Նիկոլ Փաշինյանը։ Այս մասին, ներկայացնելով հարցման արդյունքները, նշել է Gallup International Association–ի հայաստանյան ներկայացուցչության տնօրեն Արամ Նավասարդյանը։
Երկրորդ հորիզոնականում է ԲՀԿ–ն, որի օգտին պատրաստ է իրենց ձայնը տալ հարցվածների 6.7%–ը, նրան են հետևում ՀՀԿ–ն (1,5%), «Լուսավոր Հայաստանը» (1,2%), ՀՅԴ–ն (1%)։
«Մնացած քաղաքական ուժերը հավաքել են 1%–ից քիչ», – ասաց Նավասարդյանը։
«Իմ քայլն» արժանացել է հարցվածների ամենամեծ համակրանքին. դաշինքին ամբողջությամբ դրական է վերաբերվում քաղաքացիների 52,7%–ը։
ԲՀԿ–ի հասցեին «համեմատաբար դրական» է արտահայտվել քաղաքացիների 49,1% –ը։ Իսկ ՀՀԿ–ն արժանացել է հարցվածների 66,3% –ի «բացասական վերաբերմունքին»։
Հարցվածների մոտ 12,7 %–ը հրաժարվել է պատասխանել հարցերին, իսկ 6,7%–ը դժվարացել է պատասխանել։–0–
