ԵՐԵՎԱՆ, 12 հունվարի. /Նովոստի–Արմենիա/. Օտարերկրյա պետհամարանիշներով մեքենաների սեփականատերերը Հայաստանում ճանապարհային երթևեկության կանոնների խախտման համար տուգանք ունենալու դեպքում կվճարեն դրանք սահմանի վրա, երեքշաբթի լրագրողներին տեղեկացրեց Ճանապարհային ոստիկանության իրավաբանական բաժնի պետ Արման Չիլինգարյանը։

Նրա խոսքով` այս փոփոխությունն ուժի մետ կմտնի 2016 թ.–ի մարտի 1–ից, ինչից հետո օտարերկրյա պետհամարանիշներ ունեցող ավտոմեքենաներով կատարված խախտումները կֆիքսվեն տեսահսկման սարքերի կողմից։ Կատարված խախատումների մասին էլեկտրոնային համակարգերի միջոցով կիրազեկվի նաև Հայաստանի մաքսային ծառայությունը։

«Սահմանապահները տեղում կիրազեկեն ավտոմեքենայի սեփականատիրոջը տուգանքի առկայության մասին, ինչից հետո վարորդին կտրամադրվի երկու ամիս ժամկետ, որը նաև տուգանքի հարցով որոշումը բողոքարկելու ժամկետն է։ Եթե ավտոմեքենայի սեփականատերը չվճարի տուգանքը երկու ամսվա ընթացքում, ապա նա մեկ տարով կզրկվի երկիր մուտք գործելու իրավունքից», – նշեց նա։

Իսկ եթե օտարերկրյա պետահամարանիշներով մեքենայի սեփականատերը Հայաստանի քաղաքացի է, ապա տուգանքների մասին իրազեկումը կիրականացվի սովորական ընթացակարգով։

«Եթե օտարերկրյա քաղաքացին գտնվում է Հայաստանում երկար ժամանակ, ապա նա պարտավոր է  հաշվառում անցնել բնակության վայրում։ Այդ հասցեով էլ կուղարկվեն կատարված խախտումների մասին ծանուցումները», – ասաց նա։–0–