ԵՐԵՎԱՆ, 23 մարտի. /Նովոստի Արմենիա/. Ներկայացվել է «Վերածնունդ» երիտասարդական ավանի էսքիզային նախագիծը, որը կկառուցվի Երևանի Կենտրոն վարչական շրջանում:
Ինչպես Facebook-ի ի էջում նշել է ՀՀ սպորտի և երիտասարդության հարցերի փոխնախարար Արսեն Քարամյանը, այս ծրագիրը սպասված է, շուտով կներկայացվեն նաև այս համալիրի բնակարանների հատակագծերը:
ՀՀ կառավարությունը հինգշաբթի նիստում որոշել է «Երևանի պետական համալսարանի շրջանավարտների միավորում» հասարակական կազմակերպությանը Մոնթե Մելքոնյան փողոցին հարակից 6,57 հա մակերեսով հողատարածք հատկացնել` բնակարանային ապահովման սոցիալական և ներդրումային ծրագրի շրջանակում շինարարություն իրականացման համար: Տարածքը կվաճառվի կադաստրային գնով: Նախատեսվում է, որ ներդրումների ընդհանուր ծավալը կկազմի 52 մլրդ դրամ: Ծրագրի մեկնարկը նախատեսվում է 2018 թվականի ապրիլի 1-ին, իսկ ավարտը՝ 2021 թվականի հուլիսի 1-ին։
Ինչպես նշվում է «Երևանի պետական համալսարանի շրջանավարտների միավորում» հասարակական կազմակերպության կայքում, ծրագրի շրջանակում «Դալմայի այգիներ» տարածքի մոտ կկառուցվի երիտասարդական համալիր` ժամանակակից ճարտարապետական որոշումներով:
Երիտասարդական ավանում նախատեսվում է կառուցել 1250 բնակարան, ստորգետնյա ավտոկայանատեղեր, հանրային նշանակության տարածքներ (խանութներ, հյուրանոցային համալիրներ, կենցաղային սպասարկման օբյեկտներ): Նախատեսվում է ավանն ապահովել ժամանակակից լուսավորությամբ, կանաչապատ տարածքով, կձևավորվեն հաղորդակցության համակարգեր, խաղահրապարակներ, մինի ֆուտբոլի համար նախատեսված դաշտ, հանգստի համար նախատեսված կանաչ տարածքներ:
Ծրագրին մասնակցելու համար ընտրված են արդեն շահառուներ, ներկա պահին նոր հայտեր չեն ընդունվելու: Եթե շինարարական աշխատանքներից հետո ազատ տարածներ մնան, կհայտարարվի լրացուցիչ հերթագրում:
Լիովին վերանորոգված 1 քմ տարածքի գինը կկազմի 296 հազար դրամ, ոչ վերանորոգվածը` 276 հազար դրամ: Կառուցման աշխատանքները նախատեսվում է ավարտին հասցնել մինչև 2020 թվականի սեպտեմբեր:
Ընդ որում նախատեսվում է բնակարանների հիփոթեքային գնման տարբերակը, ինչի համար անհրաժեշտ կլինի վճարել 20% կանխավճար: Հիփոթեքը կտրամադրվի մինչև 20 տարի մարման ժամկետով` մինչև 8,5 տոկոս տարեկան տոկոսադրույքով` մարման անուիտետային ժամանակացույցով: Համակարգի շահառուները կկարողանան օգտվել եկամտահարկի հաշվին հիփոթեքի տոկոսների մարման հնարավորության օրենքից:–0–
