«Խնդրում եմ տեր կանգնեք երեխաներիս, նրանց տարեք ստուգման, Արմինեին` նույնպես». այսօր գիշերը ինքնասպան եղած տղամարդը գրություն է թողել

ԵՐԵՎԱՆ, 18 հունվարի. /Նովոստի–Արմենիա/. Այսօր գիշերը ինքնասպանության դեպք է գրանցվել Երևանում։

Ինչպես ավելի վաղ հաղորդվել էր, 34–ամյա Դավիթ Մելքումյանը, ըստ նախնական տեղեկությունների, 12-րդ հարկից իրեն ցած է նետել: Մելքումյանը «ՏԱՎՈՒՇ» նախագիծ ՍՊԸ-ի տնօրեն էր, ամուսնացած էր, խնամքին ուներ 2 երեխա և սպասում էին երրորդ երեխային:

Pastinfo-ի հաղորդմամբ, Դավիթը, ով Տավուշի մարզի բնակիչ էր, նախօրեին Երևան էր եկել եղբոր տուն։

Աղբյուրի տեղեկացմամբ, նա ունեցել է առողջական խնդիրներ։ Այդ մասին մահացածի եղբորը ահազանգել և տեղյակ է պահել Իջևանի հոգեբույժը:

Նա գտնվել է հոգեպես անհավասարակշիռ վիճակում և փաստորեն Երևան գալուց ընդամենը ժամեր անց գործել է ինքնասպանություն:

Չնայած այն փաստին, որ տվյալ պահին տանը այլ անձինք էլ են եղել, օգտվելով հյուրասենյակում մենակ գտնվելու հանգամանքից`տղամարդը 12-րդ հարկից նետվել է ցած։

Ըստ կայքի տեղեկությունների՝ տղամարդը վերջին շրջանում շատ մտահոգիչ է իրեն դրսևորել և անգամ կյանքին վերջ դնելու մտքեր է արտահայտել, իրեն անգամ թվացել է, որ անբուժելի հիվանդ է:

Հայտնի է դարձել նաև, որ նրա ավտոմեքենայի սրահից մի գրություն է հայտնաբերվել, որում նա խնդրել է հարազատներին, այդ թվում եղբորը իր երեխաների մասին հոգ տանել, նրանց հետազոտման տանել։

«Խնդրում եմ տեր կանգնեք իմ երեխաներին, ես էլ չեմ կարող այսպես ապրել, երեխաներին տարեք ստուգման, Արմինեին` նույնպես, պտուղը չի կարելի պահել, վաճառեք ամեն ինչ միայն փրկեք նրանց», – նշվում է գրության մեջ։

Թե ինչն է նրան այդքան անհանգստացրել, առայժմ հնարավոր չի եղել պարզել:–0–