ԵՐԵՎԱՆ, 28 ապրիլի./Նովոստի–Արմենիա/. ՀՀԿ պատգամավոր Կարեն Կարապետյանը (ռուսաստանցի գործարար, «Տաշիր» խմբի սեփականատեր Սամվել Կարապետյանի եղբայրը, խմբգր.) հայտարարել է, որ ճիշտ չի լինի, որ ՀՀԿ-ն հանդես գա սեփական թեկնածուով ՀՀ վարչապետի ընտրություններում։
«Չեմ կարող ասել՝ առաջադրելու է, թե ոչ: Սակայն իմ կարծիքով՝ ստեղծված իրավիճակում ճիշտ չի լինի, որ ՀՀԿ-ն հանդես գա սեփական թեկնածուով: Նոր իրողությունների պայմաններում ՀՀԿ-ն չի կարողանա արդյունավետ կառավարել: Այսքան տարի իշխում է ՀՀԿ-ն, և այդ տարիների հետևանքն են նաև հասարակական ընդվզումները: Կուտակված անարդարությունները, կոռուպցիան և այլ արատավոր երևույթները, որոնց մասին բազմիցս բարձրաձայնել եմ (լինելով այդ կուսակցության անդամ), հանգեցրել են այն վիճակին, ինչ ունենք այժմ», – ասել է Կարապետյանը 1in.am–ին տված հարցազրույցում։
Խոսելով վարչապետի պաշտոնակատար Կարեն Կարապետյանի մասին, ում անունը շրջանառվում է որպես ՀՀԿ–ի կողմից հավանական թեկնածու` պատգամավոր Կարապետյանը նշել է, որ «նա շատ խելացի մարդ է։
Загружается новость ... "Лево"
«Կարծում եմ՝ իշխանության մնալու համար չի գնա հակասական դաշտում ընտրությունների: Եթե գնաց, ապա կսխալվի, եթե գնաց, ուրեմն այսքան տարի ես իրեն լավ չեմ ճանաչել», – ավելացրել է նա։
Պատգամավոր Կարապետյանը կարծում է, որ ճգնաժամն ուղղակի ակնհայտ է, բայց դրա հաղթահարման համար ընդամենը պետք է բոլոր կողմերը լինեն խոհեմ ու հավասարակշռված, չգնան արկածախնդրությունների:
«Դրա համար եմ ասում, որ նորից ՀՀԿ-ականի ընտրվելով խնդիրները չեն կարգավորվի», – նշել է ՀՀԿ պատգամավորը։
«Առաջնային պետք է լինեն երկրում կայունությունը, հնարավոր մարտահրավերներին ու վտանգներին դիմակայելու իմունիտետը պահպանելն ու առկա ճգնաժամը բացառապես սահմանադրական ճանապարհով կարգավորելու ընկալումը: Այս ամենը գիտակցելով էր, որ Սերժ Սարգսյանը հրաժարական ներկայացրեց: Սա պետք է գիտակցի նաև յուրաքանչյուր ՀՀԿ-ական», – ասել է նա։
Պատգամավորը կարծում է, որ պետք է հաշվի նստել հեղափոխական առկա վիճակի հետ:
«Խորհրդարանական խմբակցություններից շարժման մասնակիցները «Ելք» և «Ծառուկյան» դաշինքներն են, ուրեմն թեկնածուն կամ թեկնածուները պետք է լինի իրենցից: Իսկ ՀՀԿ-ն ուղղակի պիտի իր դիրքորոշումն արտահայտի», – հայտարարել է Կարապետյանը։
«Ծառուկյան» դաշինքի պատգամավոր Լուիզա Սարգսյանը «Նովոստի–Արմենիա» գործակալությանը հայտնել է, որ դաշինքը կարող է առաջադրել իր թեկնածուին ՀՀ վարչապետի պաշտոնում։ Սպասվում է, որ այսօր դաշինքի առաջնորդ Գագիկ Ծառուկյանը հանդես կգա հայտարարությամբ երկրում ստեղծված ներքաղաքական իրավիճակի կապակցությամբ։–0–
