Ջերմաստիճանը կնվազի, տեղումներ են սպասվում

ԵՐԵՎԱՆ, 19 փետրվարի. /Նովոստի–Արմենիա/. Հայաստանում ջերմաստիճանի նվազում է կանխատեսվում։

Հայպետհիդրոմետի հաղորդմամբ, փետրվարի 20–ի գիշերը հանրապետության տարածքում ջերմաստիճանը կնվազի 3–4 աստիճանով, իսկ ցերեկը` նույնքանով կբարձրանա։

Ամենացուրտ եղանակը կգրանցվի փետրվարի 20–23–ը գիշերային ժամերին Շիրակում և Գեղարքունիքում, ինչպես նաև Կոտայքի, Արագածոտնի և Վայոց Ձորի լեռներում, որտեղ սպասվում է -4...-9 աստիճան։

Երևանում փետրվարի 19–ին ցերեկային ժամերին սպասվում է +11...+13 աստիճան, հետագա երեք օրերին կտաքանա` հասնելով +13...+15–ի, փետրվարի 23–ին ջերմաստիճանը կբարձրանա ևս 1–2 աստիճանով։ Գիշերային ժամերին մայրաքաղաքում բացասական ջերմաստիճաններ չեն սպասվում։

Միաժամանակ, այսօր ժամանակ առ ժամանակ սպասվում են տեղումներ` լեռնային շրջաններում թաց ձյան, նախալեռնային և հովտային շրջաններում` անձրևի տեսքով։ Փետրվարի 20–23–ը սպասվում է առանց տեղումների եղանակ։

Քամին կլինի հարավ–արևմտյան` 3–8 մ/վ արագությամբ։–0–