ԵՐԵՎԱՆ, 25 փետրվարի. /Նովոստի–Արմենիա/. Ինքնասպանությունների թիվը 2015 թվականին Հայաստանում աճել է, հինգշաբթի լրագրողներին հայտնեց ԱԻՆ ճգնաժամային ազգային կենտրոնի ղեկավար Հովհաննես Խանգելդյանը:
Նրա խոսքով, 2015 թվականին նախորդ տարվա նույն ժամանակահատվածի համեմատ դեպքերի թիվը 40-ով ավելացել է: «Անցած տարի գրանցվել է ինքնասպանության 557 փորձ և 195 դեպք, այդ թվում` 133 ինքնասպանության դեպք կախվելու միջոցով և 32 դեպք բարձրունքից ցած նետվելու միջոցով»,-ասաց Խանգելդյանը:
«Նաև եղել են ինքնահրկիզման, երակները կտրելու, զենքի կիրառման և դեղահաբերի միջոցով կյանքին վերջ տալու փորձեր»,-ավելացրեց նա:
Կենտրոնի ղեկավարի խոսքով, ամենախոցելի տարիքում են 40-ից բարձր տարիք ունեցող մարդիկ (բոլոր դեպքերի 78 տոկոսը): Խանգելդյանը նաև նշեց, որ ինքնասպանությունների դեպքերի քանակով տղամարդիկ 3-4 անգամ գերազանցում են կանանց:
Իր հերթին հոգեբան Սամվել Խուդոյանն ավելացրեց, որ եվրոպական երկրների համեմատ, Հայաստանում ինքնասպանությունների թիվն ավելի քիչ է:
«Ամենալուրջ սթրեսային իրավիճակ` հատկապես կորուստ կարող է մարդու հասցնել ինքնասպանության: Ցանկացած մարդ կարող է բախվել սթրեսային իրավիճակի հետ, դեպրեսիայի մեջ ընկնել, բայց և այնպես որոշ մարդիկ դիմում են ինքնասպանության, որոշները` ոչ»,-ասաց Խուդոյանը:
Նա ավելացրեց, որ ամենից հաճախ ինքնասպանության են դիմում թույլ հոգեվիճակ ունեցող մարդիկ, նշելով, որ նրանք հաճախ խնդրի լուծումը տեսնում են դրանցից խույս տալու մեջ:
Հոգեբանի խոսքով, մարդու ինքնասպանություն գործելու մտադրության 4 ակնարկ կա: Նա նաև նշեց, որ ինքնասպանության մտքից հեռանալու հնարավորություն է հոգեկան ծանր վիճակից դուրս գալը:-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
