ԵՐԵՎԱՆ, 7 մարտի. /Նովոստի-Արմենիա/. «Ռեգիոն» հետազոտական կենտրոնը, ապրիլի 2-ին կայանալիք խորհրդարանական ընտրություններին ընդառաջ, Facebook սոցիալական ցանցում իրականացրել է հայկական քաղաքական ուժերի ագիտացիոն գործունեության մոնիթորինգ:
Կենտրոնի տնօրեն Լաուրա Բաղդասարյանի խոսքով, հետազոտությունն իրականացվել է փետրվարի 15-ից մարտի 1-ն ընկած ժամանակահատվածում: Նա նշց, որ քաղաքական գործիչների շրջանում բաժանորդագրվածների թվով (40 հազար) Facebook-ում առաջատար է ընդդիմադիր պատգամավոր Նիկոլ Փաշինյանը «Ելք» դաշինքից: Աճել է նախկին արտգործնախարար Րաֆֆի Հովհաննիսյանի էջի բաժանորդագրվածների թիվը (մոտ 33 հազար), ով Օհանյան-Րաֆֆի-Օսկանյան դաշինքից է, ինչպես նաև` պաշտպանության նախկին նախարար Սեյրան Օհանյանի էջին բաժանորդագրվածների թիվը (19,5 հազար):
«Facebook–ում մյուս քաղաքական գործիչների էջերի բաժանորդագրվածների թիվը տատանվում է միջինը 7-9 հազարի սահմանում», - ընդգծեց Բաղդասարյանը:
Նրա խոսքով, հետազոտության շրջանակում իրականացվել է փոքր հարցում 9 քաղաքական ուժերի շրջանում, որոնք մասնակցելու են ընտրություններին: Ութ քաղաքական ուժերը պատասխանել են հարցերին: Բացառություն է կազմել «Հայկական վերածնունդ» կուսակցությունը, որն այդպես էլ ժամանակ չգտավ պատասխանելու համար», - ասաց Բաղդասարյանը:
Քարոզարշավը բոլորի գրպանով չէ
Բաղդասարյանն ընդգծեց, որ հարցումը վերաբերում էր նախընտրական մեթոդներին: «Բացի «Ելք» դաշինքից, մնացած բոլոր քաղաքական ուժերը պատասխանել են, որ օգտագործելու են հնարավոր բոլոր միջոցները: «Ելքից» պատասխանել են, որ մտադիր են հրաժարվել վճարովի եթերից», - ավելացրեց կենտրոնի ղեկավարը:
Facebook-ը` որպես ընտրազանգվածի վրա ազդեցության միջոց
Այն հարցին` արդյոք Facebook-ը կարևո՞ր հարթակ է քարոզարշավի համար, բոլոր քաղաքական ուժերը դրական պատասխան են տվել:
«Օրինակ, Հայ ազգային կոնգրես և Հայաստանի ժողովրդական կուսակցություն դաշինքի տեսանկյունից Facebook-ը կարևորագույն հարթակն է, որի միջոցով կարելի է թիրախավորել ընտրազանգվածը: ՀՀԿ-ն նշել է, որ Facebook-ը կարևոր է զանգվածային ընտրազանգվածի ներգրավման, երիտասարդների և Սփյուռքի հետ աշխատանքի համար», - ավելացրեց Բաղդասարյանը:
«Այսօր Facebook-ում գրանցված է Հայաստանի մոտ 1 մլն բնակիչ, որոնցից միայն 130 հազարն են 18 տարեկանից ցածր: Այսինքն մոտ 99%-ը պոտենցիալ ընտրողներն են, ովքեր կարող են էական ազդեցություն ունենալ ընտրությունների ընթացքի վրա», - ավելացրեց Բաղդասարյանը:
«Բոլոր քաղաքական ուժերը կարծում են, որ Facebook-ում ճիշտ քարոզի միջոցով հնարավոր է ոչ միայն ցանկալի արդյունքի հասնել ընտրությունների ժամանակ, այլև ազդել դեռևս չկողմնորոշված ընտրազանգվածի վրա», - ավելացրեց Բաղդասարյանը:
Նրա խոսքով, Facebook-ում ներկայացված են ընտրություններին մասնակցող բոլոր քաղաքական ուժերը: «Ընտրական գործընթացների պատմության մեջ առաջին անգամ ՀՀԿ-ն Facebook-ում էջ է ստեղծել: Օրինակ, նախորդ նախագահական ընտրությունների ժամանակ` 2013 թ.-ին, գործում էր միայն կայքը», - ասաց Բաղդասարյանը: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
