Հայկական մի շարք ԶԼՄ–ների ղեկավարներ Երևանում կկազմակերպեն հանրահավաք` հանուն խոսքի ազատության

ԵՐԵՎԱՆ, 10 օգոստոսի. /Նովոստի–Արմենիա/. Չորեքշաբթի Ազատության հրապարակում կանցկացվի «Հանուն խոսքի ազատության» բողոքի ակցիան։

Բողոքի ակցիան նախաձեռնել են հայաստանյան առաջատար լրատվամիջոցների մի խումբ ղեկավարներ՝ ոչ ասելու բռնություններին, դատապարտելու լրագրողների դեմ իրականացվող հարձակումները, պահանջելու անհապաղ պատժել լրագրողների մասնագիտական գործունեությունը խոչընդոտողներին, գրում է aravot.am–ը։

Ազատության հրապարակում նախատեսվում է ընթերցել հայտարարության տեքստ, որը բաց կլինի ստորագրելու համար:

Հուլիսի 19–ին և հուլիսի 30–ի գիշերը ոստիկանությունը ցրեց ակցիայի մասնակիցներին, ովքեր սատարում էին ՊՊԾ գնդի տարածքը զավթած «Սասնա ծռեր» խմբին։ Ոստիկանության գործողությունների ժամանակ տուժեցին ինչպես ակցիայի մասնակիցները, այնպես էլ տեղի բնակիչներ ու լրագրողներ։ Իրավապաշտպանների որակավորմամբ` այդ ընթացքում կիրառվեց չափից շատ ուժ, և նրանք պահանջում են պատժել մեղավորներին։ –0–