ԵՐԵՎԱՆ, 27 սեպտեմբերի. /Նովոստի–Արմենիա/. Հայաստանի նախագահ Սերժ Սարգսյանը երեքշաբթի կառավարության կազմում մի քանի նախարարների վերանշանակման հրամանագրեր է ստորագրել։
Մասնավորապես, արդարադատության նախարար կրկին նշանակվել է Արփինե Հովհաննիսյանը, Արմեն Երիցյանը վերանշանակվել է արտակարգ իրավիճակների նախարարի պաշտոնում, Արտեմ Ասատրյանը` աշխատանքի և սոցիալական հարցերի նախարար, իսկ Հրանուշ Հակոբյանը` սփյուռքի նախարարի պաշտոնում։
Իրենց պաշտոններն են պահպանել նաև «Դաշնակցություն» կուսակցությունը ներկայաղնող նախարարներ` Դավիթ Լոքյանը կրկին զբաղեցրել է տարածքային կառավարման և զարգացման նախարարի պաշտոնը, իսկ Լևոն Մկրտչյանը պահպանել է Հայաստանի կրթության և գիտության նախարարի պաշտոնը։
Հայաստանի հանրապետական կուսակցության և Դաշնակցության միջև առկա պայմանավորվածությանը համապատասխան` վերջինս ստացել է նախարարական երեք պորտֆել։
ՀՅԴ–ից երրորդ նախարարն էկոնոմիկայի նախկին նախարար Արծվիկ Մինասյանն է, ով կառավարության նոր կազմում զբաղեցրեց բնապահպանության նախարարի պաշտոնը։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
