Հայ գործարարներն իրենց մասնագիտական տոնը կունենան

ԵՐԵՎԱՆ, 9 փետրվարի. /Նովոստի-Արմենիա/. ՀՀ կառավարությունը հինգշաբթի նիստի ժամանակ հավանություն է տվել Հայաստանում Գործարարի օրը նշելու առաջարկին:

«Այս օրը` մարտի 3–ը, պատահական չէ ընտրված, քանի որ դա հանրաճանաչ հայազգի գործարար և բարերար Ալեքսանդր Մանթաշևի ծննդյան օրն է», - ասաց ՀՀ տնտեսական զարգացման և ներդրումների նախարար Սուրեն Կարայանը:

Տոնի նախաձեռնողները հույս ունեն, որ դրանով հարգանքի տուրք կմատուցեն հայ ժողովրդի արժանի զավակին և այն գործարարներին, ովքեր իրենց գործով օրինակ են վերցնում Մանթաշևից:

Ալեքսանդր Մանթաշյանը (Ալեքսանդր Մանթաշյանց, 1842 - 1911) հայ նշանավոր գործարար ու բարեգործ է, զբաղվել է նավթի արտահանմամբ և ստացել «նավթի արքա» մականունը։ Մանթաշյանցի նավթի առևտրական տներն ու նրանց մասնաճյուղերը առկա էին ողջ աշխարհում՝ իրենց ցանցի մեջ առնելով տարբեր երկրներ ու քաղաքներ՝ Վարշավա, Մադրիդ, Փարիզ, Օդեսա, Սարատով, Սուդան, Բեյրութ, Պաղեստին, Կալկաթա, Բոմբեյ, Կ. Պոլիս, Զմյուռնիա։

Մանթաշյանի միջոցներով Ռուսաստանի և Եվրոպայի լավագույն ուսումնական հաստատություններում են սովորել 200 ավելի հայ պատանիներ ու աղջիկներ, որոնցից շատերը հետագայում դարձել են գիտության, մշակույթի, արվեստի և գրականության հայտնի գործիչներ։ -0-