ԵՐԵՎԱՆ, 15 ապրիլի./Նովոստի–Արմենիա/. ՀՀ գլխավոր դատախազությունը ոստիկանությանը հանձնարարել է ապրիլի 14–֊ին Հանրային ռադիոյի շենքում ԱԺ պատգամավոր Նիկոլ Փաշինյանի գլխավորությամբ մի խումբ անձանց իրականացրած գործողությունների փաստի առթիվ «ՀՀ քրեական դատավարության օրենսգրքի» 180-181-րդ հոդվածներով նախատեսված կարգով նախապատրաստել նյութեր՝ քրեական գործ հարուցելու հիմքերի առկայությունը ստուգելու նպատակով։
Ապրիլի 13–ի երեկոյան Փաշինյանը շուրջօրյա ակցիա է սկսել Սերժ Սարգսյանի հնարավոր վարչապետության դեմ։ Ակցիայի մասնակիցները փակել են Ֆրանսիայի հրապարակի երթևեկն` ամբողջությամբ արգելափակելով հրապարակի բոլոր հինգ մուտքերը։ Ակցիան շարունակվում է ավելի քան երկու օր։
Загружается новость ... "Лево"
ՀՀ ոստիկանության հաղորդմամբ, նյութերի նախապատրաստման շրջանակում վերցվել են Հանրային ռադիոյի շենքում տեղադրված տեսանկարահանող սարքերի տեսաձայնագրությունները: Դրանց զննությամբ պարզվել է, որ խաղաղ հավաքի իրավունքը ոմանց համար նշանակում է պետական պահպանության տակ գտնվող ռազմավարական նշանակության օբյեկտ զավթելու հատուկ «օպերացիա»: Մասնավորապես, տեսանյութում հստակ երևում է, որ նշված շինության զավթմանը նախորդում է օբյեկտի նախնական «հետախուզումը», պայմանական նշաններով միմյանց հետ հաղորդակցվելը, այնուհետև՝ խմբակային ներխուժումը պահպանվող օբյեկտ: Ներխուժողների համար որևէ զսպող նշանակություն չունեցավ անգամ այն հանգամանքը, որը շենքը գտնվում էր ոստիկանական պահպանության ներքո: Ավելին, անտեսվեց ոստիկանության ծառայողների օրինական պահանջը՝ շենքը մուտք չգործելու վերաբերյալ:
Այսպես կոչված «խաղաղ հավաքի» մասնակիցներից ոմանք, որոնց ինքնությունն արդեն իսկ ճշտված է, հաղթահարված համարելով ոստիկանության ծառայողների դիմադրությունը, չխորշեցին անգամ ոտքի հարվածներով ջարդել շենքի դռներից մեկը՝ նյութական վնաս պատճառելով ընկերությանը:
Ի դեպ, ոստիկանության ծառայողները շինության պահպանությունն իրականացնելիս են եղել մարտական զենքով: Հավաքի կազմակերպիչը իր անգործությամբ ուղղակի վտանգել էր երիտասարդների կյանքն ու առողջությունը, քանի որ ոստիկանության ծառայողները բոլոր հիմքերն ունեին ենթադրելու, որ պահպանվող օբյեկտի վրա կատարվում է խմբակային հարձակում: Այս հանգամանքն օրինական հիմք էր թե զենքը մերկացնելու, թե ոստիկանության ծառայողին որոշակի հեռավորությունից չմոտենալու պահանջ ներկայացնելու, և թե զենքի գործադրման մտադրության մասին նախազգուշական կրակոց արձակելու համար, ինչը կարող էր հանգեցնել ողբերգական հետևանքների, եթե չլիներ ոստիկանության ծառայողի զսպվածությունն ու պրոֆեսիոնալիզմը:
Նյութերի նախապատրաստման փուլում ծանուցումներ են ուղարկվել դեպքին առնչվող բոլոր անձանց՝ ոստիկանություն ներկայանալու և բացատրություններ տալու նպատակով:
Ապրիլի 14–ի հաղորդում է ստացվել այն մասին, որ ակցիայի մասնակիցները, Փաշինյանի գլխավորությամբ, հաղթահարելով անվտանգության ծառայության աշխատակիցների դիմադրությունը, ներխուժել են «Հայաստանի հանրային ռադիո» ՓԲԸ–ի շենք, որը ռազմավարական օբյեկտ է, ենթակա է պետական պաշտպանության և գտնվում է ոստիկանության հսկողության ներքո։ Ակցիայի մասնակիցները մտել են կազմակերպության կաբինետներից մեկը` կոտրելով փակ դուռը։ Ոստիկանության աշխատակիցը պահանջել է Փաշինյանից դուրս հանել ակտիվիստներին շենքից և ազատել այն։ Սակայն ակցիայի կազմակերպիչը չի փոխանցել ոստիկանի օրինական պահանջը ցուցարարներին և չի կատարել է «Հավաքների ազատության մասին» օրենքի պահանջը։ Ներխուժած մարդիկ խոչընդոտել են կազմակերպության գործունեությանը, իսկ Փաշինյանը պահանջել է տրամադրել ուղիղ եթեր։–0–
