ԵՐԵՎԱՆ, 12 փետրվարի. /Նովոստի–Արմենիա/. ՀՀ քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժնում հարուցվել է քրեական գործ 29-ամյա երիտասարդի ինքնասպանության փորձի դեպքի առթիվ, հաղորդում է ՀՀ ՔԿ մամուլի ծառայությունը։
 
Երևանում 29-ամյա երիտասարդը ինքնասպանության փորձ է կատարել>>
 
2016թ. փետրվարի 10-ին՝ ժամը 19:50-ին, «Սուրբ Գրիգոր Լուսավորիչ» բժշկական կենտրոնից ահազանգ է ստացվել այն մասին, որ Երևան քաղաքի Մոլդովական փողոցի շենքերից մեկի հարևանությամբ գտնվող ավտոտնակից «աջ քունքային շրջանի հրազենային վնասվածք» ախտորոշմամբ իրենց մոտ է տեղափոխվել 1987թ. ծնված Ս.Առաքելյանը: Վերջինիս մայրը հիվանդանոցում հայտարարել է, որ որդին ինքն իրեն կրակել է:

Դեպքի առթիվ հարուցվել է քրեական գործ ՀՀ ՔՕ 110-րդ հոդվածի 1-ին (սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնելը) և 235-րդ հոդվածի 1-ին (ապօրինի կերպով հրազեն, բացի ողորկափող հրազենից եւ դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը՝) մասերով։

Կատարվում է նախաքննություն:

Պարզվել են 29–ամյա երիտասարդի ինքնասպանության փորձի մանրամասները>>

Քննություն է տարվում պարզելու երիտասարդի` ինքնասպանության փորձ կատարելու հանգամանքները, պատճառները:

Քրեական գործով էական հանգամանքներ պարզելու համար նշանակվել են փորձաքննություններ:–0–