ԵՐԵՎԱՆ, 4 օգոստոսի. /Նովոստի–Արմենիա/. Տեղեկատվական անվտանգության փորձագետ Սամվել Մարտիրոսյանը զգուշացնում է, որ համացանցում նոր վիրուս է հայտնվել, որը «քողարկվում է» ոստիկանության հաղորդագրության ներքո։
Ուղերձն իրենից ներկայացնում է ծանուցում այն մասին, թե իբր պոռնկագրական նյութեր պարունակող կայքեր բազմիցս այցելելու համար ՀՀ ոստիկանության կողմից արգելափակվել է համակարգիչը և որպես տուգանք անհրաժեշտ է վճարել 8.500 ՀՀ դրամ։
«Ցանցում հայտնվել է ու շատ արագ տարածվում է վիրուս, որը հայերեն է ու ներկայանում է ՀՀ Ոստիակնության անունից։ Նման բան տեսնելիս հանկարծ չվազեք վճարելու։ Վիրուսը նստում է Քրոմի մեջ»,– գրել է Մարտիրոսյանը Facebook–ում։
Մարտիրոսյանը նշել է, որ այն օգտատերերը, որոնք չեն կարողանում ջնջել extension–ները, պետք է պարզապես ջնջեն Քրոմն ու կրկին այն տեղադրեն։ «Նման ծանուցում կարող է ստացվել նաև էլեկտրոնային փոստով, այս դեպքում պարզապես հարկավոր է նամակը նշել որպես սփամ։ Նաև բջջային տարբերակ կա, սակայն դեռ պարզ չէ, թե ինչպես կարելի է այն հեռացնել», – նշել է Մարտիրոսյանը։
Այս դեպքին արձագանքել է նաև ՀՀ ոստիկանության մամուլի ծառայությունը` տարածելով հաղորդագրություն, որտեղ նշվում է, որ համացանցում շրջանառվում է տեղեկատվություն, որ բազմաթիվ քաղաքացիների բջջային հեռախոսների կամ անձնական օգտագործման համակարգիչների ինտերնետ դիտարկիչներում սկսել են հայտնվել հաղորդագրություններ, թե իբր պոռնկագրական նյութեր պարունակող կայքեր բազմիցս այցելելու համար ՀՀ ոստիկանության կողմից արգելափակվել է օգտատիրոջ համակարգիչը և որպես տուգանք անհրաժեշտ է վճարել 8.500 ՀՀ դրամ։
«Նույն հաղորդագրությամբ քաղաքացիներին ներկայացվում է տուգանքները վճարելու հաշվեհամար՝ վկայակոչելով ՀՀ քրեական օրենսգրքի 242-րդ հոդվածը։ Հարկ է նշել, որ ՀՀ քրեական օրենսգրքի 242-րդ հոդվածը վերաբերում է ճանապարհային երթևեկության և տրանսպորտային միջոցների շահագործման կանոնները խախտելուն», – նշվում է ոստիկանության տարածած հաղորդագրության մեջ։
Ոստիկանությունը հայտնում է, որ խնդրո առարկա հաղորդագրությունները որևէ առնչություն չունեն ՀՀ ոստիկանության հետ, իսկ դիտարկված կասկածելի կայքը, որի հղումով մուտք է գործել օգտատերը, հնարավոր է պարունակած լինի նման հաղորդագրություն ցուցադրելու համար նախատեսված ծրագրային ապահովում, ինչի գործարկման արդյունքում հաղորդագրությունը հայտնվել է բջջային հեռախոսում կամ համակարգչում։
«ՀՀ ոստիկանությունը հորդորում է չվճարել պահանջվող գումարը և համացանցից օգտվելու արգելափակումը վերացնելու համար մաքրել համակարգչի ինտերնետ դիտարկման արդյունքում կուտակված ֆայլերը (cache) և դիտարկչի հավելումները (extension) կամ դիմել համապատասխան համակարգչային մասնագետի», – նշվում է ոստիկանության հայտարարության մեջ։
Ոստիկանությունը նաև զգուշացնում է, որ այն քաղաքացիները, ովքեր տուժել են խարդախների գործունեությունից, կարող են դիմել ՀՀ ոստիկանության ԿՀԴՊ ԳՎ։–0–
