Հայ գիտնականների համապարփակ վերլուծությունը հրապարակվել է Frontiers in Oncology միջազգային հեղինակավոր պարբերականում

ԵՐԵՎԱՆ, 11 հունվարի./Նովոստի–Արմենիա/. Հայաստանում քաղցկեղի իրավիճակի համապարփակ վերլուծությունը հրապարակվել է Frontiers in Oncology միջազգային հեղինակավոր գիտական պարբերականում։ 

Այս մասին հայտնել է Երևանի պետական բժշկական համալսարանի ռեկտոր, առողջապահության նախկին նախարար Արմեն Մուրադյանը Facebook–յան իր էջում։ 

«Մեր մասնագիտական թիմի հոդվածը տպագրվեց բարձր impact factor ունեցող հայտնի ամսագրում: Հայաստանում քաղցկեղի իրավիճակի համապարփակ վերլուծությունը, որ կատարվել է մասնագետների մի մեծ թիմի կողմից, հրապարակվեց Frontiers in Oncology հայտնի գիտական պարբերականում», – նշել է Մուրադյանը։

Նա շնորհակալություն է հայտնել ողջ թիմին աշխատանքներին ակտիվ ներգրավվածություն ունենալու համար, բոլոր համահեղինակներին ու աշխատանքային խմբի անդամներին` իրենց մասնագիտական աջակցության, խորհուրդների համար։ 

Frontiers in Oncology–ն հրապարակում է մանրամասն գրախոսություն անցած ուսումնասիրություններ, որոնց միջոցով փորձ է արվում ընդլայնել գիտելիքները քաղցկեղի, դրա ախտորոշման, բուժման նոր ռազմավարությունների և վերահսկման մասին։–0–