ԵՐԵՎԱՆ, 15 հուլիսի. /Նովոստի-Արմենիա/. Ryanair և Wizz Air լոուքոսթերները նախատեսում են դուրս գալ հայկական շուկա: Այս մասին այսօր լրագրողների հետ հանդիպմանն ասաց Քաղավիացիայի կոմիտեի նախագահ Տաթևիկ Ռևազյանն` ամփոփելով պաշտոնավարման մեկ տարին:
«Լոուքոսթեր ընկերություններն արդեն պատրաստակամություն են հայտնել 2020 թ.-ի ամռանից մտնել հայկական շուկա ինքնաթիռների գնման հետ կապված բոլոր խոչընդոտների և խնդիրների լուծման դեպքում», - ասաց Ռևազյանը:
Ըստ նրա, լոուքոսթերների համար հայկական ավիաշուկայի գրավչությունը բարձրացնելու նպատակով կոմիտեն մշակել է օրենսդրական փոփոխություններ, ըստ որոնց նոր ավիաուղղություների գործարկման համար կտրամադրվեն զեղչեր, այդ թվում` կբացառվի այսպես կոչված «օդի փողը»:
Նա նշեց, որ նման մոտեցում կկիրառվի միայն նոր ուղղությունների դեպքում և բացառապես հաշվի առնելով ֆինանսական տեսանկյունից դրա ռիսկայնությունը ընկերությունների համար:
«Մենք հատուկ արտոնություններ չենք տալիս ավիաընկերություններին, քանի ապագայում դա կարող է հանգեցնել մենաշնորհի, անբարեխիղճ մրցակցության և գների բարձրացման: Մենք առաջարկում ենք արտոնություններ 5 տարով նոր ուղղության համար, ընդ որում, եթե, օրինակ, Երևան-Մարսել ուղղությամբ չվերթերը կիրականացնի Ryanair-ը, այն արտոնություններ կստանա, ընդ որում, եթե նույն ուղղությամբ չվերթեր գործարկի նաև Air France-ը, ապա այդ ընկերությունը նույնպես կօգտվի արտոնություններից», - ասաց Ռևազյանը:
Ինչպես նշեց Կոմիտեի նախագահը, օրինագիծը գրեթե պատրաստ է, և օգոստոսի վերջում նախատեսված վերջին հանդիպման և քննարկումներից հետո, այն կներկայացվի ԱԺ–ի քննարկմանը:
Խոսելով այն կետերի մասին, որտեղից նոր լոուքոսթերները թռնելու են դեպի Հայաստան` նա նշեց, որ, ամենայն հավանականությամբ, դա կլինեն այդ ավիաությունների բազավորման օդանավակայանները:
«Դուք կարող եք նայել, թե որտեղ են նրանք բազավորվում և համապատասխանաբար ավիաընկերությունները կընտրեն այդ ուղղությունները` դեպի Երևան չվերթեր սկսելու համար», - ասաց Ռևազյանը:
Նրա խոսքով,երկու ընկերություններն արդեն գրավոր հետաքրքրություն են հայտնել Հայաստանում գործունեություն իրականացնելու համար, ընդ որում հետաքրքրված են Հայաստանում գործող երկու օդանավակայաններով` Երևանում և Գյումրիում:-0-
