Քեյս «Նովոստի–Արմենիա». ինչպես գործարկեցինք անվճար email ծանուցումների ծառայություն և 3 ամսում հավաքեցինք 300 բաժանորդ

ԵՐԵՎԱՆ, 16 դեկտեմբերի./Նովոստի–Արմենիա/. 2021թ.–ի հոկտեմբերին գործարկեցինք մեր առաջին և Հայաստանում միակ հեղինակային email ծանուցումների ծառայությունը, որի միջոցով ամեն շաբաթ պատմում ենք Երևանի կարևոր մշակութային իրադարձությունների մասին։ Նշենք, որ վաղուց էինք մտածում նման ծառայություն գործարկելու գաղափարի շուրջ. ուսումնասիրել ենք շուկան, փնտրել մեր լսարանի համար հետաքրքիր թեմաներ, որոնք հարմար կլինեն email ծանուցման ձևաչափին։ Աշխարհը պատած կորոնավիրուսն ու Արցախյան պատերազմը ստիպեցին մեզ ժամանակավորապես հետաձգել email ծանուցման գաղափարը։ Եվ ահա, հաղթահարելով բոլոր դժվարությունները, մենք վերջապես կյանքի կոչեցինք վաղուց մշակած գաղափարը։

Ինչու՞ որոշեցինք email ծանուցումներ գործարկել հենց մշակութային միջոցառումների վերաբերյալ։ Մինչև համավարակը մեր կայքում գործարկել էինք «Մշակութային աֆիշա» բաժինը, մտահաղացումը լավն էր, արժանացավ դրական արձագանքների։ Բայց պարզ էր, որ միայն այս ձևաչափը բավարար չէ` գաղափարն ամբողջությամբ կյանքի կոչելու համար։ Բացի այդ մարդիկ, հատկապես բարդ պատմական ժամանակաշրջաններում, մշակույթի և արվեստի կարիք ունեն։ Հենց դրանք են հույս տալիս, օգնում հասնել ներդաշնակության։

Մեր խորհուրդներով ուզում ենք օգնել բաժանորդներին պլանավորել ազատ ժամանակը, հիշեցնել, որ Երևանում մշակութային կյանքը եռում է, որ կարելի է ամեն օրը տոն դարձնել։

Այս պահին մեր email ծանուցումներին հետևում է ավելի քան 300 բաժանորդ։ Օգտվելով առիթից` ուզում ենք շնորհակալություն հայտնել յուրաքանչյուրին և հուսալ, որ մեր նամակներն իսկապես օգտակար ու հետաքրքիր են։ Ընդ որում մեր բաժանորդները միայն Հայաստանից չեն։ Մեր ծանուցումներին հետևում են Ռուսաստանից, Ուկրաինայից, Մեծ Բրիտանիայից, ԱՄԷ–ից, Գերմանիայից, Բելառուսից, Սիրիայից, Վրաստանից, Սերբիայից, Իսրայելից, Շվեյցարիայից և Կանադայից։ Մենք անկեղծորեն ուրախ ենք, որ մեր լսարանն այդքան բազմազան է և ձգտում ենք ծանուցման մեջ ներառել նաև միջոցառումներ Սփյուռքի հայրենակիցների համար։

Ի դեպ, որոշեցինք չսահմանափակվել խորհուրդներով։ Լոյալ բաժանորդների համար պատրաստել ենք բոնուսներ։ Ամեն շաբաթ վիճակահանության միջոցով բաժանորդներին ենք տրամադրում համերգների, ներկայացումների, պրեմիերաների և երևանյան այլ միջոցառումների տոմսեր։ Արդեն նվիրել ենք ավելի քան 100 տոմս և ստացել բազմաթիվ շնորհակալական արձագանքներ։ Հետադարձ կապը ոգեշնչում է մեզ և ուժ հաղորդում`նոր նախագծեր ստեղծելու և հները կատարելագործելու համար։

Պետք է խոստովանենք, որ եղել են դեպքեր, երբ տոմսեր ստացած բաժանորդները չեն վերցրել դրանք և ներկա չեն եղել միջոցառմանը։ Մեծ ջանքեր ենք գործադրել` հետադարձ կապի արդյունավետ մեխանիզմ ստեղծելու համար, որպեսզի հնարավոր լինի կարգավորել տոմսերի փոխանցման գործընթացը։

Ակնհայտն էր, որ տոմսերի վիճակահանության ձևաչափը մի փոքր անսովոր է հայ լսարանին, և այն ներդնելու համար հարկավոր է ժամանակ և գրագետ աշխատանք։ Մենք միշտ պատրաստ ենք լսել մեր ընթերցողների խնդիրներն ու առաջարկել լուծումներ։
Եվ, իհարկե, պատրաստ ենք փոփոխությունների և կատարելագործման։ Մենք ոգեշնչված ենք, ինչը հենց ձեր արձագանքի շնորհիվ է։ Վերջում ուզում ենք պարզապես շնորհակալություն հայտնել, որ կարող ենք օգտակար լինել մեր լսարանին և անել այն, ինչն իսկապես սիրում ենք։–0–