Դերասանուհի Արսինե Խանջյանը մտադիր է դիմել դատարան ՀՀ ոստիկանության գործողությունների կապակցությամբ

ԵՐԵՎԱՆ, 4 օգոստոսի. /Նովոստի–Արմենիա/. Կանադահայ ռեժիսոր Ատոմ Էգոյանի կինը` հայտնի դերասանուհի Արսինե Խանջյանը, մտադիր է դատարան դիմել հուլիսի 27–ին իր նկատմամբ ոստիկանության անօրիանական գործողությունների կապակցությամբ։ Այդ մասին հինգշաբթի լրագրողներին հայտնեց նրա փաստաբան Արամազդ Կիվիրյանը։

Հուլիսի 27–ին Արսինե Խանջյանը մասնակցել է Խորենացի փողոցում կազմակերպված ակցիային, ինչի պատճառով բերման է ենթարկվել բաժին և մի քանի ժամ անցկացրել է այնտեղ։

«Մենք պատրաստվում ենք բողոքարկել ոստիկանության ոստիկանության անօրիանական գործողությունները դատական ատյաններում և համապատասխամ բնորոշում տալ դրանց։ Մեր հայցը բաղկացած կլինի երկու հիմնական մասերից` վարչական և քրեական»,– ասաց Կիվիրյանը։

Փաստաբանը պարզաբանեց, որ պարեկապահակային ծառայության գնդի շենքի մոտ դերասանուհուն, և նրա հետ միասին ակցիայի մյուս մասնակիցներին բերման են ենթարկել առանց որևէ բացատրության, տարել են չգիտես ուր, վերցրել նրանց անձնական իրերը, հեռախոսները, ֆոտոխցիկները` թույլ չտալով դիմել իրավական օգնության։

«Միակ բացատրությունն այն էր, որ քաղաքացիներին այդ օրը արգելված էր մասնակցել գրավված շենքի մոտակայքում անցկացվող ցույցին, սակայն ոչ մի իրավական հիմք չկար: Ոստիկանության աշխատակիցները խախտել են քաղաքացիների ազատ արտահայտման, տեղաշարժվելու, հավաքներին մասնակցելու իրավունքը, մասնագիտական գործունեությունն իրականացնելու իրավունքը և այլն», - ասաց Կիվիրյանը:

Փաստաբան Լուսինե Սահակյանն իր հերթին ավելացրեց, որ իրենց նպատակը քրեական պատասխանատվության հասնելն է, և իրենք կփորձեն գտնել հարցի լուծումը:

«Եթե մեզ չհաջողվի լուծել այս հարցը ներպետական ատյաններում, ապա կդիմենք Մարդու իրավունքների եվրոպական դատարան: Համոզված եմ, որ այս որոշումն ինչ-որ բան կփոխի Հայաստանում, իրավապահ մարմինների վերաբերմունքը քաղաքացիների և լրագրողների նկատմամբ», - հայտարարեց Սահակյանը:

Ընդդիմադիր Ժիրայր Սեֆիլյանի զինված կողմնակիցները հուլիսի 17–ին ներխուժել են ՊՊԾ գնդի տարածք։ Նրանք պահանջում էին ազատ արձակել Ժիրայր Սեֆիլյանին, ով կալանավորվել էր շուրջ մեկ ամիս առաջ մի խումբ անձանց կողմից զենք ապօրինի պահելու կասկածանքով։

Հուլիսի 31-ին զինված խումբը զենքը վայր է դրել և հանձնվել իշխանություններին: Այս ընթացքում զոհվել է ոստիկանության երկու աշխատակից: Զինված խմբի անդամների և իրավապահ մարմինների աշխատակիցների շրջանում եղել են վիրավորներ: -0-