Չի բացառվում, որ Հայաստանը հրաժարվի դեղատոմսով դեղ վաճառելու կարգից

ԵՐԵՎԱՆ, 1 մարտի./Նովոստի–Արմենիա/. Հարևան Վրաստանը փորձեց կիրա­ռել դեղատոմսով դեղ վաճառելու կարգը, սակայն երկու տարի անց հրաժարվեց, գրում է «Ժողովուրդ» օրաթերթն ու ավելացնում, որ չի բացառվում նույնը լինի նաև Հայաստանում։

Հոդվածի հեղինակները նաև նշում են, որ ՀՀ-ում գրանցված դեղերի մի մասն այսօրվանից կվաճառվի միայն դեղատոմսով: Դրանք հիմնական հակաբորբոքային միջոցներն են, հակաբիոտիկները, հորմոնալ և հոգեմետ նյութեր պարունակող դեղերը: 

«Բայց առաջ­նային հարց է մնում կառավարության սահմանած կարգի նկատմամբ վերահսկողությունը, որպեսզի դեղերը վաճառվեն միայն դեղատոմսով», – նշվում է հոդվածում։

«Առողջապահության նախարարությունից «Ժողովուրդ» օրաթերթին հայտնեցին, թե հանրապե­տությունում գործող բոլոր դեղատներն արդեն ստացել են միայն դեղատոմսով վաճառվող դեղերի ցանկը, և այսօրվա­նից սահմանափակումները լիարժեք գործելու են: Նաև տեղեկացանք, որ թեև վերահսկող մարմինը գոյություն ունի, սակայն այժմ վերակազմավորման փուլում է և իր գործառույթները կատարելու է միայն ահազանգերի դեպքում: Նա­խարարությունից նաև փոխանցեցին, որ թերևս հոկտեմբերից բոլոր դեղատներում կգործեն էլեկտրոնային համակար­գեր, որոնք հնարավորություն կտան ֆիքսել բոլոր գնումները», – նշում է թերթը։–0–