Բոլոր ուժային կառույցները և շտապօգնության ծառայությունն աշխատում են ուժեղացված ռեժիմով Կապանում գրանցված երկրաշարժից հետո

ԵՐԵՎԱՆ, 28 փետրվարի. /Նովոստի–Արմենիա/. Բոլոր ուժային կառույցները և շտապօգնության ծառայությունն աշխատում են ուժեղացված ռեժիմով Կապանում մի քանի ժամ առաջ գրանցված երկրաշարժից հետո, տեղեկացրեց Սյունիքի մարզպետի մամուլի քարտուղար Վազգեն Սաղաթելյանը։

Երեքշաբթի առավոտյան 10։17–ին 3.9 մագնիտուդով երկրաշարժ է տեղի ունեցել Սյունիքի մարզում։ Ցնցումները հիմնականում զգացվել են Կապանում 5 բալ ուժգնությամբ, Գորիսում և Քաջարանում` 4–5 բալ ուժգնությամբ։ Երկրաշարժին հետևել է հետցնցում 3,3 մագնիտուդով։


«Իրավիճակն ամբողջությամբ վերահսկողության տակ է։ ԱԻՆ-ի պահանջով` ելնելով անվտանգության նորմերից, բոլոր դպրոցներից, բուհերից, պետական և մասնավոր հիմնարկներից մարդիկ շատ կազմակերպված մեկ ժամով դուրս են եկել շենքերից։ Այս պահին արդեն վերադառնում են իրենց աշխատանքին», – գրել է Սաղաթելյանը Facebook–յան իր էջում։

Նա նաև ընդգծել է, որ տեղեկությունն այն մասին, որ կան փլուզված շենքեր չի համապատասխանում իրականությանը։

«Մարզպետն անձամբ այցելել է թիվ 10 միջնակարգ դպրոցը, որի մասին համացանցում տեղեկություն էր տարածվել, թե իբր փլուզումներ կան և համոզվել, որ շենքը կանգուն է, երեխաներին չի սպառնում ոչ մի վտանգ և իրավիճակը ամբողջությամբ վերահսկվում է», – գրել է Սաղաթելյանը։–0–