Երևանում մեկնարկել է Beeline Smart 7 նոր սմարթֆոնի վաճառքը

ԵՐԵՎԱՆ, 24 մայիսի. /Նովոստի–Արմենիա/. «ԱրմենՏել» ՓԲԸ-ն (ապրանքանիշը` Beeline) հայտարարում է Beeline Smart 7 սմարթֆոնի վաճառքի մեկնարկի մասին, հաղորդում է ընկերության մամուլի ծառայությունը:

Սմարթֆոնի արժեքը 22900 դրամ է, որը ներառում է մեկ ամիս բաժանորդագրություն «Smart Հատուկ» սակագնային փաթեթին և 5000 ՄԲ ծավալով բջջային ինտերնետ 6 ամիս ժամկետով:

Սմարթֆոնը պատկանում է բյուջետային մոդելների շարքին, ունի գրավիչ դիզայն և աշխատում է Android 5.1 օպերացիոն համակարգով: Հեռախոսն ունի 4-միջուկային պրոցեսոր, 2 տեսախցիկ` 5 և 1,3 մեգապիքսել հզորությամբ և 4 դյույմանոց էկրան:

Ինչպես նշել է Հայաստանում Beeline-ի գլխավոր տնօրեն Անդրեյ Պյատախինը,
ընկերությունն ընդլայնում է բյուջետային հեռախոսների տեսականին, որոնք գնային առումով հասանելի լինելով, միաժամանակ համապատասխանում են օգտագործողների մեծ մասի պահանջներին:

«Մեր նոր սմարթֆոնը, բջջային ինտերնետի օգտագործման հնարավորությամբ, դարձնում է այն ավելի հասանելի, իսկ Beeline ծառայություններից օգտվելն` ավելի պարզ և հարմար», - նշել է նա:

«Smart Հատուկ» սակագնային փաթեթը 1500 դրամ բաժանորդային վարձի դիմաց տրամադրում է ամսական անսահմանափակ ներցանցային զանգեր, 1 ԳԲ ծավալով բջջային ինտերնետ առանց արագության սահմանափակման և 100 տեղական SMS-հաղորդագրություն:

«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ ($1 – 477,58 դրամ)։ -0-