Բացահայտվել են Քանաքեռ-Զեյթունում կատարված մի շարք բնակարանային գողություններ

ԵՐԵՎԱՆ, 29 հունվարի./Նովոստի–Արմենիա/. ՀՀ քննչական կոմիտեի ԵՔՔՎ Քանաքեռ-Զեյթուն վարչական շրջանի քննչական բաժնում քննվող քրեական գործով ձեռնարկված մեծածավալ քննչական, օպերատիվ-որոնողական միջոցառումների արդյունքում բացահայտվել են բնակարանային մի շարք գողություններ, հաղորդում է ՀՀ ՔԿ մամուլի ծառայությունը։

2018 թվականի հունվարի 26-ին ահազանգ է ստացվել, որ նույն օրը ժամը 18:10-23:30-ն ընկած ժամանակահատվածում գողություն է կատարվել Երևան քաղաքի Լեփսիուսի 4-րդ շենքի բնակարաններից մեկում. ենթադրյալ հանցագործություն կատարած անձը (անձինք) ապօրինի մուտք են գործել բնակարան և հափշտակել շուրջ 60 գրամի տարբեր տեսակի ոսկյա զարդեր:


Դեպքի առթիվ 2018 թ.–ի հունվարի 26–ին ՀՀ քննչական կոմիտեի ԵՔՔՎ Քանաքեռ-Զեյթուն վարչական շրջանի քննչական բաժնում հարուցվել է քրեական գործ ՀՀ քրեական օրենսգրքի 177-րդ հոդված 3-րդ մասի 1.1-րդ կետով (գողություն), բնակարանի սեփականատերը ճանաչվել է տուժող:

Կատարվել է դեպքի վայրի զննություն և մի շարք այլ անհետաձգելի գործողություններ, որոնց արդյունքում փաստական տվյալներ են ձեռք բերվել, որ կատարված գողությանը մասնակցություն է ունեցել երկու անձ, պարզվել նրանց ինքնությունը, ովքեր հանդիսանում են Երևանի բնակիչներ` ծնված 1987 և 1989 թթ.: Բազմակողմանի քննության արդյունքում բացահայտվել է նույն անձանց կողմից կատարված բնակարանային գողության ևս երեք, գողության փորձի երկու դեպք:

Կասկածյալները հունվարի 27-ին ձերբակալվել են, գողոնի մի մասը՝ հայտնաբերվել:

«Նախաքննությունը շարունակվում է, ձեռնարկվում են ակտիվ քննչական և օպերատիվ-որոնողական միջոցառումներ նշված անձանց կողմից հնարավոր այլ հանցավոր դրսևորումները բացահայտելու ուղղությամբ», – նշվում է հաղորդագրության մեջ։–0–