ԵՐԵՎԱՆ, 24 ապրիլի. /Նովոստի-Արմենիա/. Հոլիվուդյան դերասան և բարերար Ջորջ Քլունին և Aurora Prize միջազգային մարդասիրական մրցանակաբաշխության հավակնորդները ծանոթացան Երևանում Հայոց ցեղասպանության թանգարան-ինստիտուտի ցուցադրությանը, հայտնեց «Նովոստի-Արմենիա» գործակալության թղթակիցը Ծիծեռնակաբերդի հուշահամալիրից:
Հայոց ցեղասպանության 101-րդ տարելիցի կապակցությամբ Ծիծեռնակաբերդի հուշահամալիրում` Անմար կրակի մոտ ծաղկեպսակ դնելուց հետո Ջորջ Քլունին, Aurora Prize-ի հյուրերը և հավակնորդներն այցելեցին թանգարան, որտեղ ծանոթացան թանգարանի գործունեությանն ու ցուցադրությանը:
«Ավրորա» մրցանակի չորս հավակնորդներն են՝
• Մարգարիտ Բարանկից, Բուրունդիի «Խաղաղության տուն» (Maison Shalom) խնամքի տուն եւ REMA հիվանդանոց։ Բուրունդիում մոլեգնող քաղաքացիական պատերազմի տարիներին որբերին ու փախստականներին խնամելով՝ Մարգարիտ Բարանկիցեն հազարավոր կյանքեր է փրկել, այդ թվում՝ մոտ 30,000 երեխա։ 2008 թվականին նա հիմնել է հիվանդանոց, որում մինչ օրս բժշկական օգնություն է ստացել 80,000 մարդ։
• Բժիշկ Թոմ Քաթինա, Սուդանի Նուբա լեռների «Գթության Մայր» հիվանդանոց։ Ամերիկացի այս բժիշկը ապստամբներից կողմից վերահսկվող Նուբա լեռների (Սուդան) «Գթության Մայր» հիվանդանոցի միակ բժիշկն է։ Չնայած Սուդանի կառավարության կողմից տարածաշրջանի բազմակի ռմբոկոծումներին՝ բժիշկ Քաթինան մարդկանց օրուգիշեր հասանելի լինելու համար մշտապես բնակվում է հիվանդանոցի տարածքում։
• Սայիդա Ղուլամ Ֆաթիմա, Պակիստանի «Կախյալ շահագործվողների ազատագրության ճակատի» (BLLF) գլխավոր քարտուղար։ Սայիդա Ղուլամ Ֆաթիման իր կյանքը նվիրել է պարտքի դիմաց ֆիզիկական շահագործման ենթարկվողներին փրկելուն՝ փորձելով վերացնել մերօրյա ստրկության վերջին ձևերից մեկը։ Նրա ջանքերի շնորհիվ պակիստանցի հազարավոր բանվորներ են փրկվել, այդ թվում՝ 21,000 երեխա։
• Հայր Բերնար Կինվի, Կենտրոնաաֆրիկյան Հանրապետության Բոսեմտելե քաղաքի կաթոլիկ միսիայի վանահայր։ Կենտրոնաաֆրիկյան Հանրապետությունում մոլեգնող քաղաքացիական պատերազմի ընթացքում Բոսեմտելեի իր միսիայի տարածքում Հայր Բերնարդ Կինվին հակամարտության երկու կողմի տուժածներին ապաստարան ու բժշկական օգնություն է տրամադրել՝ հետապնդումից ու մահից փրկելով հարյուրավոր մարդկանց։
Չորս հավակնորդներից յուրաքանչյուրն ուներ հնարավորություն ներկայացնելու մինչև երեք կազմակերպություն, որոնք կարող են առաջադրվել մեկ միլիոն դրամաշնորհի՝ ապրիլի 24-ին դափնեկրի անունը հայտնի դառնալուն պես: Բացի այս մեկ միլիոն ԱՄՆ դոլարի դրամաշնորհի հնարավորությունից, դափնեկրին տրվելու է 100,000 ԱՄՆ դոլարի անհատական պարգև։
Aurora Prize–ի 4 հավակնորդները ներկայացրել են այն կազմակերպությունները, որոնց կցանկանային առաջադրել 1 մլն դոլար դրամաշնորհի>>
Aurora Prize մրցանակի ընտրական հանձնաժողովի համանախագահներն են Խաղաղության նոբելյան մրցանակակիր Էլի Վիզելն ու օսկարակիր դերասան և բարեգործ Ջորջ Քլունին։ Բացի այդ, հանձնաժողովում ներառված են նոբելյան մրցանակակիրներ Օսկար Արիասը, Շիրին Էբադին և Լեյմա Գվոբին, Իռլանդիայի նախկին նախագահ Մերի Ռոբինսոնը, իրավապաշտպան Խինա Ջիլանին, Ավստրալիայի նախկին արտգործնախարար և Միջազգային ճգնաժամային խմբի պատվավոր նախագահ Գարեթ Էվանսը ու նյույորքյան Քարնեգի կորպորացիայի նախագահ Վարտան Գրեգորյանը։
Aurora Prize մրցանակաբաշխությունը տեղի կունենա 2016 թ.–ի ապրիլի 24–ին Երևանում։
100 LIVES նախագիծը հիմնադրվել է միջազգային գործարարներ և բարերարներ Ռուբեն Վարդանյանի և Նուբար Աֆեյանի, ինչպես նաև մարդասեր Վարդան Գրեգորյանի կողմից` ներկայացնելու համար Հայոց ցեղասպանության հետևանքները, ինչպես նաև այն, թե մշակույթի, արվեստի, սպորտի, գիտության և բիզնեսի ոլորտում որքան լուրջ ներդրում է հաջողվել կատարել ցեղասպանությունից փրկված մարդկանց և նրանց ընտանիքներին։-0-
