Նախորդ տարվա համեմատ արտակարգ իրավիճակների քանակը տոնական օրերին էականորեն աճել է. ԱԻՆ

ԵՐԵՎԱՆ, 11 հունվարի. /Նովոստի–Արմենիա/. 2016 թվականի առաջին օրերին Հայաստանում արտակարգ իրավիճակների քանակը նախորդ տարվա նույն ժամանակահատվածի համեմատ աճել է, երկուշաբթի լրագրողների հայտնեց ՀՀ  տարածքային կառավարման և արտակարգ իրավիճակների նախարարության ճգնաժամային կառավարման ազգային կենտրոնի պետ Հովհաննես Խանգելդյանը:

«Հանրապետությունում  տոնական օրերին արձանագրվել է 676 արտակարգ իրավիճակ, որը 250 դեպքով ավել է անցած տարվա նույն ժամանակահատվածի համեմատ»,-ասաց Խանգելդյանը:

Նա  ավելացրեց, որ 2016 թվականի 10 օրվա ընթացքում Հայաստանում արտակարգ իրավիճակների պատճառով զոհվել է երեք մարդ, տուժել՝ 56-ը:

«Մահվան մեկ դեպք է գրանցվել հրդեհի, մեկը` ՃՏՊ-ի հետևանքով, մի հոգի մահացել է  ձնաբուքում սառելու պատճառով»,-ընդգծեց Խանգելդյանը:

Նրա խոսքով, հունվարի 1-10-ը ընկած ժամանակահատվածում  92 հրդեհ է գրանցվել: Այս ցուցանիշը նախորդ տարվա համեմատ չի փոխվել: Խանգելդյանը ավելացրեց, որ ընթացիկ տարում էականորեն կրճատվել է ՃՏՊ-ների թիվը:

«Այս տարի գրանցվել ՃՏՊ-ի 25 դեպք` 23 տուժածներով և մեկ զոհով, միաժամանակ 2015 թվականի նույն ժամանակահատվածում գրանցվել էր 34 ՃՏՊ` 36 տուժոծով և չորս զոհով»,-ասաց Խանգելդյանը:

Նա նաև ընդգծեց, որ ընթացիկ տարվա առաջին օրերին արձանագրվել է 263 կենցաղային կանչ` կապված բնակարաններում ջրագծերի խաթարման հետ:

«Հանրապետությունում 2016 թվականի 10 օրվա ընթացքում մայրուղիների ձնարբուքների պատճառով արձանագրվել է մեքենաների արգելափակման 234 դեպք»,-ասաց Խանգելդյանը:-0-