ԶԼՄ–ները հայտնում են ավտոբուսի պայթյունի մեջ կասկածվող տղամարդու անունը
ԵՐԵՎԱՆ, 26 ապրիլի./Նովոստի–Արմենիա/. Լրատվամիջոցները հայտնում են Երևանի Հալաբյանի փողոցում ավտոբուսի պայթյունի մեջ կասկածվող տղամարդու անունը։
«Երկիր Մեդիա» հեռուստաալիքի հաղորդմամբ` նա 40–ամյա Ռուբեն Բալյանն է։
Ավելի վաղ Քննչական կոմիտեն հաղորդել էր, որ նախօրեին Երևանում պայթած ավտոբուսում հայտնաբերվել է հեռախոսային քարտ, որի տիրոջ տանը խուզարկության արդյունքում հայտնաբերվել է տրոտիլ և դետոնատոր։
Լրագրողները գտել են Ձորաղբյուրում գտնվող Բալյանի սեփական տունն ու զրուցել համայնքի ղեկավար Արայիկ Միքայելյանի հետ, ով տեղեկացրել է, որ Բալյանը սրված հարաբերությունների մեջ էր սեփական մոր հետ։
Նախօրեին ժամը 21։51–ի սահմաններում ահազանգ է ստացվել, որ Հալաբյան փողոցում` «Թումո» ստեղծարար տեխնոլոգիաների կենտրոնից ոչ հեռու, N63 ավտոբուսում պայթյուն է տեղի ունեցել։ Ճշտված տվյալներով, ավտոբուսի պայթյունի հետևանքով երկու մարդ է զոհվել, յոթ տուժածներ հոսպիտալացվել են, այդ թվում` անչափահասներ և հղի կին։ –0–
