Երևանում մեկնարկել է Հայաստանի անկախության 25–ամյակին նվիրված զորահանդեսը

ԵՐԵՎԱՆ, 21 սեպտեմբերի. /Նովոստի–Արմենիա/. Հանրապետության հրապարակում մեկնարկել է Հայաստանի անկախության 25–ամյակին նվիրված զորահանդեսը։

Զորահանդեսի հրամանատարն է Հայաստանի և Ռուսաստանի զինված ուժերի զորքերի միացյալ խմբավորման հրամանատար, գեներալ–մայոր Անդրանիկ Մակարյանը, զորահանդեսն ընդունում է ՀՀ պաշտպանության նախարար Սեյրան Օհանյանը։

Զորահանդեսին, որը տոնական օրվա կարևորագույն իրադարձությունն է, կներկայացվեն ռազմական տեխնիկայի նմուշներ, մասնավորապես, «Իսկանդեր» օպերատիվ–մարտավարական հրթիռային համալիրները, «Տոչկա Ու» և «Էլբրուս» մարտավարական հրթիռային համալիրները, С-300 զենիթահրթիռային համալիրները, ծանր սպառազինության այլ տեսակներ և ռազմական տեխնիկա։

Զորահանդեսին ներկա են Հայաստանի և Արցախի նախագահներ Սերժ Սարգսյանն ու Բակո Սահակյանը, ՀՀ վարչապետ Կարեն Կարապետյանը, ՀՀ ԱԺ խոսնակ Գալուստ Սահակյանը, Ամենայն Հայոց Գարեգին Երկրորդ Կաթողիկոսը, Ն.Ս.Օ.Տ.Տ. Մեծի Տանն Կիլիկիոյ Արամ Ա Կաթողիկոսը։

Չորեքաբթի՝ սեպտեմբերի 21-ին, Հայաստանը նշում է ակախության 25-ամյակը:

Հայաստանի Գերագույն խորհրդի որոշմամբ, 1991թ. սեպտեմբերի 21-ին հանրաքվե անցկացվեց՝ ԽՍՀՄ կազմից դուրս գալու և անկախ պետականություն հաստատելու վերաբերյալ։

Ընտրելու իրավունք ունեցող քաղաքացիների 99%-ը կողմ էր քվեարկել: Երկու օր անց հանրապետության Գերագույն Խորհուրդը Հայաստանը հռչակեց անկախ, ինքնիշխան հանրապետություն։ -0-