Երևանում հակառուսական հանրահավաքի մասնակիցները փորձել են մոտենալ նախագահի նստավայրին

ԵՐԵՎԱՆ, 22 ապրիլի./Նովոստի–Արմենիա/. Երևանում հակառուսական հանրահավաքի մասնակիցները փորձել են մոտենալ նախագահի նստավայրին, հաղորդում է «Նովոստի–Արմենիա» գործակալության թղթակիցը դեպքի վայրից։

«Մենք ենք տերը մեր երկրի» ակցիայի կազմակերպիչները կոչ են անում հայկական իշխանություններին ձեռնպահ մնալ ղարաբաղյան հարցի շուրջ որևէ փաստաթղթի ստորագրումից, պահպանել Ղարաբաղի ստատուս–քվոն, բացառել տարածքների զիջումները։ Ակցիայի մասնակիցները մեղադրում են Ռուսաստանին ղարաբաղյան հակամարտության սրման մեջ։ 

Նրանք պահանջում են նաև 30 հազարական դոլար վճարել զոհված զինծառայողների ընտանիքներին, ինչպես հաև յուրաքանչյուր հայ օլիգարխից (որոնց ցուցակը նրանք ևս ներկայացնում են) հավաքել 5 մլն դոլար, որոնք, ցուցարարների կարծիքով, հարկավոր է փոխանցել երկրի բյուջե` հրատապ հարցերը լուծելու համար։

Ակցիայի մասնակիցները նաև պահանջում են ՀՀ ԱԳ նախարար Էդվարդ Նալբանդյանի, պաշտպանության նախարար Սեյրան Օհանյանի, ՀՀ ԶՈւ գլխավոր շտաբի պետ Յուրի Խաչատուրովի և ուրիշների հրաժարականը։

Ակցիայի մասնակիցները Ազատության հրապարակում կազմակերպված հանրահավաքից հետո փորձել են շարժվել դեպի նախագահի նստավայր, որը գտնվում է Բաղրամյան պողոտայում` ՀՀ նախագահին իրենց պահանջները ներկայացնելու համար։

Սակայն ոստիկանությունը փակել է Բաղրամյան պողոտան, ինչի հետևանքով սկսվել է քաշքշուկ։ Ցուցարարներից մեկը հարվածել է ոստիկաններից մեկի մեջքին, ինչից հետո նրան հեռացրել են ամբոխից։ Բերման են ենթարկվել նաև մի քանի ցուցարարներ։

Դեպքի վայր ժամանած ոստիկանության լրացուցիչ ուժերը հեռացրեցին ակցիայի մասնակիցներին փողոցի երթևեկելի հատվածից։ Փողոցի երթևեկությունը վերականգնվել է։

Մետրոպոլիտենի գնացքները որոշ ժամանակ չեն կանգնել «Մարշալ Բաղրամյան» կայարանում` բացատրելով դա տեխնիկական պատճառներով։ –0–