Սուրենյան. Ամանորին Երևանում սպասվում է մինչև +14 աստիճան

ԵՐԵՎԱՆ, 26 դեկտեմբերի. /Նովոստի–Արմենիա/. Եղանակը Հայաստանի բնակիչներին իսկական ամանորյա անակնկալ է պատրաստել։

Ինչպես Facebook–յան իր էջում տեղեկացրել է Հայհիդրոմետկենտրոնի օդերևութաբանական կանխատեսումների բաժնի պետ Գագիկ Սուրենյանը, դեկտեմբերի 30-ին օդի ջերմաստիճանը Տավուշի և Սյունիքի հովտային գոտիներում կհասնի +20...+23, Արարատյան դաշտում և Երևանում` +13...+14 աստիճանի։

Հայպետհիդրոմետի հաղորդմամբ, դեկտեմբերի 27–ի գիշերը, 28–31–ը Երևանում սպասվում է առանց տեղումների եղանակ։ Միաժամանակ, օդի ջերմաստիճանը Երևանում կանխատեսվում է +10...+14։ Եվ անգամ Ամանորի գիշերը ջերմաստիճանը չի նվազի 0–ից ցածր, կգրանցվի +2...+4։

Հայաստանի ողջ տարածքում և Արցախում դեկտեմբերի 27–ից 31–ը սպասվում է առանց տեղումների եղանակ։ Քամին կլինի հարավ–արևտմյան` 3–8 մ/վ։ Օդի ջերմաստիճանն աստիճանաբար կբարձրանա 4–5 աստիճանով։–0–