ԵՐԵՎԱՆ, 30 մարտի. /Նովոստի–Արմենիա/. Աշխարհահռչակ ամերիկահայ ռոք–երաժիշտ, System of a Down խմբի մենակատար Սերժ Թանկյանը եկել է Երևան խորհրդարանական ընտրությունների ընթացքում դիտորդական առաքելություն իրականացնելու համար։
Ավելի վաղ նա կոչ էր արել աշխարհի տարբեր անկյուններում գտնվող հայ արտիստներին և ակտիվիստներին միանալ իրեն` խորհրդարանական ընտրությունների ժամանակ դիտորդական առաքելության իրականացման հարցում օգնելու համար։
SOAD–ի մենակատարը կոչ է արել նաև ստորագրել «Արդարություն Հայաստանում»
խնդրագիրը, որն արդեն ստորագրել են կանադահայ ռեժիսոր Ատոմ Եգոյանը, նրա կինը` դերասանուհի Արսինե Խանջյանը և արվեստի այլ հայտնի հայ գործիչներ։
Խորհրդարանական ընտրությունները կանցկացվեն Հայաստանում ապրիլի 2–ին, որոնք կլինեն առաջին համապետական ընտրությունները 2015 թ.–ին ընդունված սահմնադրական փոփոխություններից հետո, որոնք նախատեսում են անցում խորհրդարանական իշխանավարման գործող նախագահի լիազորությունների ժամկետի լրանալուց հետո (2018 թ.–ին)։ Ընտրություններին կմասնակցի 9 քաղաքական կուսակցություն և դաշինք։–0–
