«Սասնա ծռեր» խմբին սնունդ հասցրած Արթուր Սարգսյանի մեղադրանքը վերաորակվել է

ԵՐԵՎԱՆ, 5 օգոստոսի. /Նովոստի-Արմենիա/. Երևանի ՊՊԾ գնդի շենքը գրաված «Սասնա ծռեր» խմբի անդամներին սնունդ հասցրած 50-ամյա Արթուր Սարգսյանի մեղադրանքը վերաորակվել է, գրում է armtimes.am-ը` հղում անելով Սարգսյանի փաստաբան Արայիկ Պապիկյանին:

«Արթուր Սարգսյանն այժմ մեղադրվում է զինված խմբի անդամներին օժանդակելու համար», - հայտարարել է Պապիկյանը:

Նա չի բացառել, որ իր պաշտպանյալի նկատմամբ կալանքի միջոցը կարող է ցանկացած պահի փոխվել:

Պապիկյանը նաև նշել է, որ այս մասով այլ մանրամասների տիրապետում է Սարգսյանի մյուս պաշտպան Տիգրան Եգորյանը: Վերջինիս հետ սակայն կապ հաստատել չի հաջողվել։

Արթուր Սարգսյանը հուլիսի 25-ի լույս 26-ի գիշերը սեփական ավտոմեքենայով ճեղքել էր ոստիկանական շղթան ու մուտք գործել գնդի տարածք՝ սնունդ հասցնելով այնտեղ գտնվողներին։ Մինչ այդ զինված խմբի անդամները հայտարարել էին, որ իրենց սննդի պաշարները սպառվել են:

Ավելի վաղ նախաքննական մարմինը Արթուր Սարգսյանին նույն մեղադրանքներն էր առաջադրել, ինչ ՊՊԾ գնդի շենքը գրաված զինված խմբի մյուս անդամներին:

«Սասնա ծռերի» բոլոր անդամներին առաջադրվել է նույն մեղադրանքը՝ ՀՀ ՔՕ 218-րդ հոդվածի 3-րդ մասի 1-ին կետով (պատանդ վերցնելը) և 235-րդ հոդվածի 3-րդ մասով (ապօրինի զենք զինամթերք ձեռք բերել, իրացնել, պահել, փոխադրել): –0–