Փաշինյան. Ֆրանսիայի հրապարակում մենք բացեցինք Հայաստանի քաղաքական կյանքի նոր էջը
ԵՐԵՎԱՆ, 14 ապրիլի./Նովոստի–Արմենիա/. Ֆրանսիայի հրապարակում բացվեց Հայաստանի քաղաքական կյանքի նոր էջը, շաբաթ օրը հանրահավաքի ժամանակ հայտարարեց «Ելք» խմբակցության ղեկավար, «Քաղաքացիական պայմանագիր» կուսակցության առաջնորդ Նիկոլ Փաշինյանը։
Ուրբաթ երեկոյան Փաշինյանը շուրջօրյա ակցիա է սկսել Սերժ Սարգսյանի հնարավոր վարչապետության դեմ։ Ակցիայի մասնակիցները փակել են Ֆրանսիայի հրապարակի երթևեկն` ամբողջությամբ արգելափակելով հրապարակի բոլոր հինգ մուտքերը։ Ակցիան շարունակվում է ավելի քան մեկ օր։
«Այս հրապարակում մենք ընդդիմության համախմբան քայլ արեցինք և հույս ունենք, որ քաղաքական դաշտում կհաստատվի համերաշխություն», – ասաց նա։
Փաշինյանը նաև ընդգծեց, որ Ֆրանսիայի հրապարակը պետք է բազմամարդ լինի օրվա ցանկացած ժամի։
«Ես անձամբ այստեղ եմ գտնվելու։ Թույլ չենք տա կանխել մեր հատագա գործողությունները», – հայտարարեց նա` կոչ անելով քաղաքացիներին հավաքվել հանրահավաքի վաղը ժամը 14։00–ին և 18։30–ին։
Նրա խոսքով, չնայած, որ իշխանությունները ոստիկանական ուժեր են կուտակում հրապարակում, ակտիվիստները պատրաստ են ցանկացած զարգացման։
Փաշինյանը նշեց, որ Ֆրանսիայի հրապարակում կազմակերպված բողոքի ակցիան դառնում է լուրջ հնարավորություն ողջ ընդդիմադիր դաշտի համախմբման համար։
Նախօրեին հանրահավաքի մասնակիցներին է միացել ԱԻՄ առաջնորդ Պարույր Հայրիկյանը, առավոտից` «Ժառանգություն» կուսակցության հիմնադիր Րաֆֆի Հովհաննիսյանը, «Ազատ դեմոկրատներ» կուսակցության առաջնորդ Խաչատուր Քոքոբելյանը, «Նոր ժամանակներ» կուսակցության առաջնորդ Արամ Կարապետյանը, «Ազգային համաձայնություն» կուսակցության առաջնորդ Արամ Հարությունյանը և այլք։ Միավորվելու պատրաստակամության մասին են հայտարարել ՀԱԿ–ի երիտթևն ու «Միավորված կոմունիստներ» կուսակցությունը։
Մարտի 31–ից Նիկոլ Փաշինյանը սկսել է բողոքի ակցիաներ հանրապետության մարզերում։ Նա երթ է սկսել Գյումրիում և մինչև ապրիլի 13–ը եղել է Սպիտակում, Դիլիջանում, Սևանում և Հրազդանում` կոչ անելով հասարակությանը ակտիվորեն մասնակցել քաղաքական գործընթացներին։
Ապրիլի 9–ին տեղի ունեցավ ՀՀ չորրորդ նախագահ Արմեն Սարգսյանի երդմնակալության արարողությունը։ Նա դարձավ պետության առաջին ղեկավարը, որին ընտրեց ԱԺ–ն խորհրդարանական իշխանավարման համակարգին անցնելուց հետո։ Նույն օրը դադարեցվեցին ՀՀ նախագահ Սերժ Սարգսյանի լիազորությունները, և կառավարությունը հրաժարական տվեց։
Կառավարության ղեկավարի պաշտոնին թեկնածուների առաջադրման գործընթացը մեկնարկել է ապրիլի 9–ին և կավարտվի ապրիլի 16–ին։ Վարչապետը կընտրվի ՀՀ ԱԺ–ի կողմից ապրիլի 17–ին։–0–
