ԵՐԵՎԱՆ, 25 հոկտեմբերի. /Նովոստի–Արմենիա/. «Գազպրոմի» վարչության նախագահ Ալեքսեյ Միլլերը, ով այցով գտնվում է Հայաստանում, երեքշաբթի «Գազպրոմ Արմենիա» ՓԲԸ–ի աշխատակիցներին ներկայացրել է նոր գլխավոր տնօրեն Հրանտ Թադևոսյանին, հաղորդում է «Գազպրոմ» ընկերության
կայքը։
«Գազպրոմ Արմենիա» ընկերության գլխավոր տնօրենի պաշտոնը թափուր է մնացել հոկտեմբերի 8–ից, երբ այդ պաշտոնը զբաղեցնող Վարդան Հարությունյանը, ՀՀ նախագահի հրամանագրով, նշանակվել էր ՀՀ պետական եկամուտների կոմիտեի նախագահի պաշտոնում։
Հրանտ Թադևոսյանը ծնվել է 1962 թ.–ի ապրիլի 30–ին։ 1978–1983 թթ.–ին սովորել և գերազանցությամբ ավարտել է Երևանի Կ. Մարքսի անվան պոլիտեխնիկական ինստիտուտը` ստանալով «Ջերմագազամատակարարում ևօդափոխություն» մասնագիտությունը:
1983–1985 թթ.–ին աշխատել է «Հայկոմնախագիծ» ինստիտուտում` որպես ճարտարագետ: 1985–1986 թթ.` ՀՍՀ Գազպետկոմում` որպես ճարտարագետ, ավագ ճարտարագետ, առաջատար ճարտարագետ:
1986–1989 թթ. Թադևոսյանն աշխատել է ՀՍՀ «Պետագրոպրոմ»-ում` որպես առաջատար ճարտարագետ, միաժամանակ 1987 թ. սովորել է Մոսկվայի կառավարման համամիութենական բարձրագույն դպրոցում:
1989–1992 թթ. աշխատել է ՀՀ Գյուղատնտեսության նախարարության «Հայագրոսերվիս» միավորումում` որպես գլխավոր մասնագետ:
1992–1999 թթ. Թադևոսյանն աշխատել է «Հայգազարդ» պետական կոնցեռնում` որպես ճարտարագետ, բաժնի պետ, վարչության պետի տեղակալ, վարչության պետ և միաժամանակ 1995թ.-ին Ամերիկայի Միացյալ Նահանգներում անցել է ժամանակակից կառավարման մեթոդների ուսուցում:
1999–2011 թթ.–ին շարունակել է աշխատել «ՀայՌուսգազարդ» ՓԲԸ տեխնիկական վարչության պետի պաշտոնում:
2010թ. մայիսին Թադևոսյանը ՀՀ նախագահի հրամանագրով պարգևատրվել է «Անանիա Շիրակացի» մեդալով:
2011թ. փետրվարից նշանակվել է «ՀայՌուսգազարդ» ՓԲԸ Գլխավոր տնօրենի տեղակալ — Գլխավոր ճարտարագետ:
2014թ.–ին Թադևոսյանը եղել է «Գազպրոմ Արմենիա» ՓԲԸ Գլխավոր տնօրենի տեղակալ — Գլխավոր ճարտարագետ, վարչության անդամ:
2016թ. հոկտեմբերից Թադևոսյանը «Գազպրոմ Արմենիա» ՓԲԸ Գլխավոր տնօրենի ժամանակավոր պաշտոնակատարն էր:–0–
