Հրաչյա Հարությունյանը վաղվանից անցնելու է պատժի կրման բաց ռեժիմի

ԵՐԵՎԱՆ, 31 օգոստոսի./Նովոստի–Արմենիա/. ՌԴ-ից Հայաստան տեղափոխված հայ վարորդ Հրաչյա Հարությունյանը վաղվանից անցնելու է պատժի կրման բաց ռեժիմի, գրում է «Հրապարակ» թերթը` հղում անելով Հարությունյանի աներ Վիկտոր Մարտիրոսյանին։

«Վաղվանից բաց են թողնելու, որ գա տուն, իրիկունը գնա հետ։ Ես պետք է կազմակերպեմ, որ նա աշխատանքի ընդունվի։ Իրեն ասել են՝ մինչև մի տեղ գործի տեղ չընդունվես, քեզ բաց չենք թողնի։ Առավոտ ժամը 8-ին պետք է գա աշխատանքի, իրիկունը 7-ին հետ գնա», – ասել է Մարտիրոսյանը։

Նրա խոսքով՝ Հրաչյային այսօր տեղափոխել են «Նուբարաշեն» ՔԿՀ-ի կողքին գտնվող շենք, որտեղ բաց ռեժիմում գտնվող բանտարկյալներն են։

«Հիմա ես վաղը առավոտ գնում եմ իր մոտ, իրա փաստաթղթերը վերցնեմ, որ կազմակերպեմ, իրեն աշխատանքի ընդունեմ, որ հրամանը տանի տա հիմնարկությանը, ասի՝ ես աշխատում եմ, որ իրեն բաց թողնեն», – նշել է Մարտիրոսյանը։ 

2014 թ.-ի օգոստոսի սկզբին Մոսկվայի Տրոիցկի շրջանի դատարանը Հարությունյանին մեղավոր էր ճանաչել կեղծ փաստաթղթերի կիրառման և ճանապարհային երթևեկության կանոնների խախտման մեջ, որը երկու և ավելի մարդկանց մահվան պատճառ էր դարձել։ Դատարանը Հարությունյանին դատապարտել էր վեց տարվա և ինն ամսվա ազատազրկման։  2017 թ.–ի հուլիսի 20-ին Հարությունյանը հանձնվել էր հայկական կողմին, որպեսզի պատժի մնացած մասը կրի Հայաստանում։

ՀՀ քաղաքացի Հրաչյա Հարությունյանը բեռնատարի վարորդ է։ Նա դարձել էր ավտովթարի մեղավոր 2013 թ.–ի հուլիսին Նոր Մոսկվայի տարածքում, ինչի հետևանքով զոհվել էր 18 մարդ։ –0–