ԵՐԵՎԱՆ, 11 փետրվարի. /Նովոստի-Արմենիա/. ՀՀ կրթության և գիտության նախարար Լևոն Մկրտչյանը հայտնել է, որ նախարարությունը նախատեսում է բեկումնային և արմատական փոփոխություններ իրականացնել դասագրքերի ստեղծման գործընթացում, քանի որ դրանք չեն բավարարում ներկայիս պահանջներին:
Այս կապակցությամբ, Մկրտչյանը նախօրեին ընդունել է Մանմար, Էդիթ Պրինտ, Տիգրան Մեծ, Աստղիկ, Զանգակ, Անտարես և Արևիկ հրատարակչությունների ղեկավարներին:
Գերատեսչության մամուլի հաղորդագրության համաձայն, հանդիպման ընթացքում քննարկվել են դպրոցական դասագրքերի հետ կապված տեխնիկական և բովանդակային հարցեր: Նախարարը նշել է, որ հանրության շրջանում կա օբյեկտիվ դժգոհություն` կապված որոշ դասագրքերի որակի և ծանրաբեռնվածության հետ, ավելին` դրանք չեն բավարարում ներկայիս պահանջներին, հետևաբար նախարարությունը նախատեսում է բեկումնային և արմատական փոփոխություններ իրականացնել այս ոլորտում:
Ըստ նախարարի` վարչապետի հանձնարարականով նախատեսվում է Կրթության ազգային ինստիտուտի բարեփոխումների շրջանակում հիմնել դասագրքաստեղծ կառույց` դասագրքերի ստեղծման գործընթացը համակարգելու նպատակով:
Լևոն Մկրտչյանի խոսքով, բարեփոխումների գործընթացը պետք է սկսել հենց այսօր, որպեսզի հաջորդ տարի արդեն դաշտը բարելավված լինի:
Մկրտչյանը նշել է, որ Հայաստանում դասագրքեր կազմելիս երբեմն հաշվի չեն առնվում երեխայի ծանրաբեռնածության աստիճանը, տարիքային առանձնահատկությունները և այլն: Մասնավորապես, բնագիտական և պատմական առարկաների մասով դասագրքերում առկա է ակադեմիական չափից բարձր մակարդակ և հայերենի խրթին շարադրանք:
Այս կապակցությամբ, նախարարը հրատարակիչներին առաջարկել է ստեղծել աշխատանքային խումբ, որտեղ ներգրավված կինի նաև վերջիններիս ներկայացուցիչը:
Հաղորդագրության համաձայն, խումբը կամփոփի դասագրքաստեղծ կենտրոնի ձևավորման վերաբերյալ հրատարակիչների ներկայացրած առաջարկությունները և դիտարկումները, ինչպես նաև այլ խնդիրներ` կապված փորձագետների բազա ստեղծելու, դասագրքերի և ուսուցիչների ձեռնարկների մշակման հստակ չափանիշների և մեթոդաբանության հետ:
Ակնկալվում է, որ նման հանդիպումները պարբերական բնույթ կկրեն: