Հայաստանն ընդգրկվել է ՌԴ–ի զբոսաշրջիկների համար ամենաբյուջետային ուղղությունների խմբում

ԵՐԵՎԱՆ, 19 հունվարի. /Նովոստի–Արմենիա/. Հայաստանն ընդգրկվել է ռուսների համար ճանապարհորդությունների ոչ թանկ ուղղությունների խմբում, գրում է «Ռամբլեր. Ճանապարհորդություններ» (http://travel.rambler.ru/news/5396/) պորտալը` հղում անելով Skyscanner փորձագետների ուսումնասիրությանը։

Skyscanner–ի փորձագետներն ուսումնասիրել են ուղեցույցները, ֆորումները, սննդամթերքի գները և ապրուստի արժեքը ու կազմել են այն երկրների ցուցակը, որտեղ ձմռանը կարելի է ոչ շատ թանկ հանգիստ վայելել։

Հանգստի համար ամենաէժան ուղղությունները Հարավ–Արևելյան Ասիայի երկրներն են, ասվում է ընկերության ուսումնասիրությունում։ Ապրուստի, սննդի և տրանսպորտի համար ամենաքիչ գումարը զբոսաշրջիկները կծախսեն Հնդկաստանում, Ինդոնեզիայում, Նեպալում և Վիետնամում (գիշերելը երկու անձի համար հաշվարկով)։ Մի փոքր ավելի ($60)` Լաոսում և Շրի Լանկայում։ Կամբոջայով ճանապարհորդելը կարժենա մոտ 70 դոլար։

Էժան ուղղությունների մեկ այլ խմբում են մերձավոր արտերկրի երկրները` Աբխազիան ($65), Հայաստանը ($70) և Վրաստանը ($80)։

Մատչելի երկրների երրորդ խումբը ներկայացնում է Արևելյան Եվրոպայի երկրները` Սերբիան, Բուլղարիան, Չեռնոգորիան, Ռումինիան և Հունգարիան։ Այստեղ ծախսերը կկազմեն 70-85 դոլար։

Ցուցակը կազմելիս փորձագետները հաշվի չեն առել ավիաթռիչքի արժեքը, այլ գնահատել են միայն տեղերում կատարած ծախսերը։ Դա բացատրվում է նրանով, որ Ռուսաստանը մեծ երկիր է, և կախված մարզից` տոմսերի գները բավականին տարբեր կլինեն։ -0-