ՀՀ ԱԺ-ն նախատեսում է խաղատների համար սահմանված տարեկան տուրքը 5 անգամ բարձրացնել

ԵՐԵՎԱՆ, 21 դեկտեմբերի. /Նովոստի-Արմենիա/. Դեկտեմբերի 22-ին կայանալիք ԱԺ արտահերթ նիստի ժամանակ այլ հարցերի թվում նախատեսվում է քննարկել նաև խաղատների համար սահմանված տարեկան տուրքը 5 անգամ բարձրացնելու հարցը, գրում է «Հայկական ժամանակ» թերթը:

Ավելի վաղ հայտնի էր դարձել, որ ՀՀ կառավարությունը չորեքշաբթի արտահերթ նիստի ժամանակ առաջարկել է Ազգային ժողովին դեկտեմբերի 22-ին գումարել ՀՀ ԱԺ արտահերթ նստաշրջան, որի օրակարգում առաջարկվում է ընդգրկել «Պետական տուրքի մասին» ՀՀ օրենքում փոփոխություն կատարելու մասին ՀՀ օրենքի նախագիծը:

Ինչպես հաղորդում է պարբերականը, փոփոխություններով առաջարկվում է վիճակախաղերի և ինտերնետային շահումով խաղերի կազմակերպման համար տարեկան տուրքը` գործող բազային տուրքի 100.000-ապատիկի չափը, փոխարինել 500.000-ապատիկով: Այսինքն, նախատեսվում է խաղատների համար սահմանված տարեկան տուրքը 5 անգամ բարձրացնել և 100 մլն դրամից դարձնել 500 մլն դրամ:

Փոփոխություններն ընդունվելու դեպքում ուժի մեջ կմտնեն 2017 թ.-ի հունվարի 1-ից: Ֆինանսների նախարարությունից պարբերականին մեկնաբանել են, որ փոփոխությունն արվում է, որպեսզի համապատասխանեցվի Հարկային նոր օրենսգրքի դրույքաչափերին:

«Այս փոփոխության արդյունքում ծանր վիճակում կհայտնվեն գուցե նաև կփակվեն փոքր խաղատները, արդյունքում նորից կշահի Գագիկ Ծառուկյանի Շանգրի Լա խաղատունը կամ Փարավոն զվարճալիքների և խաղատնային համալիրը, որն առանց այդ էլ գրավել էր շուկայի 80 տոկոսը», - նշվում է գրառման մեջ: -0-