ԵՐԵՎԱՆ, 18 նոյեմբերի. /Նովոստի–Արմենիա/. Հայտնի ամերիկացի հեռուստահաղորդավար Քոնան Օ’Բրայենը նախօրեին TBS ամերիկյան հեռուստաալիքով հեռարձակվող «Քոնան» շոուի ժամանակ պատմել է Հայաստանում ստացած տպավորությունների մասին։
Նա պատմել է, որ այցելել է Հայաստան իր գործընկեր Սոնա Մովսիսյանի շնորհիվ, ով տարիներ շարունակ պատմել է իր պատմական հայրենիքի, հայկական մշակույթի, ինչպես նաև հայրենիք այցելելու իր ձգտման մասին։
«Եվ ես մտածի` չտանե՞մ Սոնային Հայաստան։ Նրան կտանեմ Հայաստան, կծանոթանամ մշակույթին, իսկ նա կլինի իմ զբոսավարը։ Դա հիանալի կլինի, և մենք մեկնեցինք», – նշել է Քոնանը։
Նրա խոսքով` նա և իր գործընկերուհին Հայաստանում մնացել են չորս օր։ Այդ ընթացքում այցելել են բազմաթիվ տեսարժան վայրեր, մասնավորապես, տեսել են Գառնիի հեթանոսական տաճարը, այցելել են Երևանի շուկաներ, Հայոց ցեղասպանության զոհերի հուշահամալիր։
Քոնանը նշել է, որ այցելությունը Ծիծեռնակաբերդ շոուի կարևոր պահերից մեկն է, և եթե որևէ մեկը կարծում է, թե ծրագիրն ամբողջությամբ բաղկացած է հումորային դրվագներից, ապա չարաչար սխալվում է։
Քոնան Քրիստոֆեր Օ’Բրայենն ամերիկացի կատակերգու է, հեռուստահաղորդավար, սցենարիստ։ 1993–2009 թթ.–ին NBC հեռուստաալիքով վարել է Late Night with Conan O'Brien հայտնի երեկոյան շոուն։ 2009–2010 թթ.–ին վարել է «The Tonight Show with Conan O'Brien» հաղորդումը։ 2010 թ.–ի նոյեմբերի 8–ից TBS հեռուստաալիքով վարում է «Conan» շոուն։–0–
